د مشهورو څېرو په اړه یوه خبره دا ده، چې خاورې هم ورته سره زر ګرځي.
دلیل یې د دوی له نومونو او څېرو سره د خلکو زیاته مینه ښودل شوې.
دلته به هغه مشهورې نړیوالې څېرې در وپېژنو، چې په انځورګرۍ كې هم د خاص هنر لرونکي دي او دغه هنر یې د شهرت له کبله نور هم د پام وړ شوی.
لوسي لیو
لوسي په فلمونو کې خاص نوم لري، خو ترڅنګ یې د انځورګرۍ د هنر خاص نوم هم دی.
دا مشهوره لوبغاړې د دې لپاره، چې د نقاشۍ هنر یې د فلمي هنر شهرت اغېزمن نه کړي او دواړه هنرونه یې سره جلا پاتې شي، کلونه ـ کلونه یې د خپلې هرې شپې په خوارۍ جوړې شوې نقاشۍ په مستعارو نومونو د هنر مینه والو ته وړاندې کړي.
د لوسي د نقاشۍ مستعار نوم یو لینگ و.
هغې ډېره موده پس خپل مستعار نوم افشا او د یوه نندارتون په جوړولو سره په ډاګه کړه، چې پياوړې انځورګره هم ده.
دنیس هاپر
د هالیووډ سینما دا افسانوي لوبغاړی هم مخکښ انځورګر یا نقاش دی.
جالبه دا ده، چې دا مشهور لوبغاړی په نقاشۍ کې د اندی وارول او نورو لویو انځورګرانو شاګرد پاتې شوی.
دیوید بویی
د راک موسیقۍ دغه مشهور نوم اصلاً د هنر او طراحۍ د برخې محصل پاتې شوی او مسلکي زده کړې یې په دغه برخه کې کړي.
نوموړي د سور ریالیزم د سبک پیروي کړي، ځکه خو یې نقاشۍ خورا په زړه پورې وې او په لوړه بیه خرڅې شوي.
جانی دپ
د هالیووډ دا مشهور لوبغاړی مشهور نقاش هم دی.
ده د ګڼو هغو نړیوالو څېرو څېرې رسامي کړې، چې د ده زیات خوښیدل.
د نوموړي نقاشۍ د ژورو مفاهیمو لرونکي دي.
جونی میچل
د دغه مشهور سندرغاړي نوم په مهمو نقاشو کې هم یادیږي.
ده د خپلو زیاتو البومونو لپاره خپله رسامي کړې، چې مینه وال یې نور هم ورسره زیات شوي.
دی په ۱۹ کلنۍ کې د هنري زده کړو له ښوونځي وویستل شو، خو وروسته یې ثابته کړه چې هنر او موسیقي یې په خټه کې اخګل شوې او غوره نقاش هم دی.
جیم کری
دا مشهور طناز اداکار هم د پام وړ نقاشۍ لري.
د ده د اثارو نندارتون په مختلفو ځایونو کې جوړ شوی، چې زیات استقبال ترې شوی.
جانی کش
دا مست سندرغاړی هم مشهور نقاش و.
هغه د فقر او انساني مصیبتونو خلاف د اعتراض په دود تل تورې جامې اغوستې او د ژوند ترپایه یې نقاشي وکړه.
د ده سندرو هم زیات مینه وال لرل.
باب دیلن
دغه مشهور ترانه جوړونکی، چې د ادبیاتو د نوبل جایزه یې هم ګټلې، د نقاشۍ له هنره هم برخمن و.
هغه د امپرسیونیسم په سبک کې نقاشي کوله.
د نوموړي د نقاشۍ د اثارو ۳ کتابونه چاپ شوي.
استیوی نیکس
دا مشهور سندرغاړی نقاش هم و، هغه نقاشۍ ته د خپل دوست استیوی په هڅونه مخه کړې وه.
د هغه دغه دوست د وینې سرطان له پښو وغورځوه.
نقاش سندرغاړي خپل ټولې تابلوګانې د هغه اروا ته ډالۍ کړې او تل یې د دغه احسان یادونه کوله.
مایکل جکسون
د پاپ موسیقۍ دغه پاچا هم ښه نقاش و.
د جکسون هغه نقاشي، چې د چارلي چاپلین له تصویر څخه و، خورا د پام وړ و.
پر دې نقاشۍ ۹ کاله کار شوی و.