لیکنه: محمدصابر حمیدي
لوی امپراطور احمدشاه بابا او د افغانستان بنسټګر، چې د امپراتورۍ لمن یې نږدې ۳۰۰ کاله مخکې د سویلي لوري څخه تر هنده، لوېدیځ خوا ته تر اصفهانه او د شمال خواته یې بیا تر بخارا پورې غځولې.
خو اوس یې په کور کې څوک نه اوسېږي او کور یې د مسوولینو او چارواکو د بې غورۍ له امله په بشپړ ډول په کنډواله بدل شوی.
د لوی امپراتور احمدشاه بابا کور د کندهار ښار د لومړي سمت اړوند د سدوزو په کوڅه کې موقیعت لري.
د معلوماتو له مخې دا کور خپله د بابا په لارښوونه په ۱۱۷۲ کې د فني او تخصوصي کارګرانو په مټ په بخارايي بڼه جوړ شوی.
خو د هغه تاریخي کور، چې په شاوخوا شپږ زره متره کې يې څو ودانۍ جوړې دي، په تېرو شلو کلونو کې هېڅ پاملرنه نه ده ورته شوې.
دغه کور، چې څه کم درې سوه کاله تاریخي مخینه لري، نهه میاشتې مخکې استملاک شو او اوس يې کندهار ښاروالۍ ساتنه کوي، خو د دولت د بې غورۍ له امله په کنډوالو بدل شوی.
د دغه کور زیاتي برخې له تخریب وروسته، د بابا د لمسیانو لخوا په سيمنټو ترمیم شوي، خو نورې ودانۍ يې بشپړل نړول شوي دوکانونه او عصري کورونه پرې جوړ شوي.
خو خبره دلته ده، چې د قاتلینو، فاسدینو او تش په نامه اتلانو مقبرې وځلول شوې او میلیارډونه ډالره پرې مصرف شوې، خو د لوی امپراطور احمدشاه بابا کور په دې خراب وضیعت کې دی.
تر اوسه نه ولایتي او نه هم مرکزي ادارې په دې تړاو څه ویلي دي.
