راپور: بشر درویش
د پکتیکا د کرنې، اوبولګولو او مالدارۍ ریاست وایي، چې ددې ولایت د جلغوزیو د ونو حاصلات او غوټې ته په کتو به سږکال ددې ولایت د جلغوزیو په حصالاتو کې د پام وړ زیاتوالی راشي.
د افغانستان د کرنې وزارت د یوې خبرپاڼې له مخې؛ د پکتیکا د کرنې ریاست په دې ولایت کې د جلغوزیو د حصلاتو د زیاتوالي په پار هلې ځلې کړي.
یاد وزارت ویلي چې ددې ولایت په پنځو ولسوالیو «ګیان، زېړوک، سروبي، سروضه او اورګون» کې د جلغوزیو او چهارمغزو د ځنګلونو د بیارغولو په پار یې کورني قوریې جوړې کړي دي او یو شمېر قوریه لرونکو ته روزنیز پروګرامونه هم په لاره اچولي دي.
د پکتیکا د ګیان ولسوالۍ یو تن اوسیدونکی زاهدالرحمن وايي:
«په تېرو شپږو کلونو کې لومړی ځل دی، چې په دې ولسوالۍ کې د جلغوزیو ونې په پراخه کچه غوټې نیولي دي. ددې ولسوالۍ د جلغوزیو سږنۍ حاصلات به د نور کلونو په پرته د پام وړ ډېر شي.»
افغان جلغوزي او نړیوال مارکیټ
پکتیکا د افغانستان د جلغوزیو او چارمغزو د ځنګلونو له برخمنو ولايتونو څخه دي، چې د دغو ځنګلونو یوه برخه له منځه تللې، خو اوس د کرنې وزارت د جلغوزیو ځنګلونو د بيا رغونې په هڅه کې دي.
دوه کاله وړاندې دغه ولایت کې ۱۲زره ټنه جلغوزي تولیدل شوي ول.
د افغانستان جلغوزي یو شمیر ولایتونو کې په پراخه کچه حاصل ورکوي، خو د پکتیکا، پکتیا او خوست کې تر ټولو په لویه کچه جلغوزه کیږي او اوس وخت کې ورته د نړیوال مارکیټ زمینه هم برابره شوې ده.
په ۱۳۹۷هـ کال کې افغانستان له اروپا، هند، چین او یو شمیر نورو هیوادونو سره هوايي دهلیزونه پرانیستل شول چې دا د نړۍ مارکیټ ته د افغان جلغوزیو د لیږد لپاره ګټور یاد شوي.
په ۱۳۹۷هـ کال افغان ولسمشر اشرف غني د لړم ۱۵ مه د جلغوزیو ملي ورځ نومولې ده.
د راپورونو له مخې د افغانستان د جلغوزیو حاصلات تر ۳۵ زره میټریک ټنه پورې رسیږي.
یوه افغان سوداګر په ۱۳۹۷هـ کال کې په کابل کې د جلغوزیو د پروسس په نړیواله معیار برابره فابریکه هم پرانیستې ده، چې ویل کیږي د سیمې هیوادونو کې ساری نه لري.
دوه کاله وړاندې د حکومت د یوه شوي اټکل له مخې چې د جلغوزیو ښه بازار ۱،۲ میلیارده ډالر د حکومت بودجې ته زیاتولی شي.
خو له دې سره سره افغان سوداګر تر ډیره انديښنه لري چې پاکستان د افغانستان جلغوزي په نړیوال مارکیټ کې په خپل نوم پلوري چې د مخنیوي لپاره به یې باید نورې جدي هڅې هم وشي.