د پاکستان کرکټ لوبډلې د شنبې په ورځ د جون په ۲۶ مه انګلستان ته سفر وکړ، هلته یې د کورونا ټېسټونه وکړل او ټېسټونه یې منفي راووتل.
دا لوبډله په انګلستان کې درې یو ورځنۍ او درې شل اوریزې لوبې د جولای په ۸ مه نېټه پیلوي.
ایا انګلستان به وکولای شي، چې په دواړو لوبلړيو کې د پاکستان لوبډله ماته کړي؟
ځکه له دې وړاندې انګلستان سریلانکا لوبډله په شل اوریز سیریز کې کلین سویپ کړه او په داسې حال کې د پاکستان لوبډله هم انګلستان ته تللې، چې د انګلستان لوبډله په ښه مُرال کې ده او هم په شل اوریزو لوبو کې لومړي مقام کې ده.
د لوبو مهالوېش
د پاکستان لوبډله به اوس تمرینات پیلوي او د لوبو لپاره به چمتووالی نیسي.
لومړۍ یو ورځنۍ لوبه د جولای په ۸ مه نېټه د مازیګر په څلور نیمو بجو د انګلستان په کارډیف لوبغالي کې پیلوي.
دویمه لوبه د جولای په لسمه د ماسپښین په دوه نیمو بجو د لندن ښار په لارډز لوبغالي کې ترسره کوي.
درېیمه یو ورځنۍ لوبه د جولای په ۱۳ مه د مازیګر په څلور نیمو بجو په برمینګهم سیمه کې ترسره کوي.
د شل اوریزو لوبو لړۍ د جولای په ۱۶ مه د شپې په لس بجو پیلوي، دویمه شل اوریزه لوبه د جولای په ۱۸ په هیډینګلي سیمه کې د ماښام په ۶ بجو پیلوي او درېیمه شل اوریزه لوبه د جولای په ۲۰ مه د شپې په لس بجې په مانچیسټر کې ترسره کوي.
د انګلستان لوبډله په شل اوریزو لوبو کې لومړي مقام کې ده او د پاکستان لوبډله په شل اوریزو لوبو کې څلورم ځای کې ده.
په یو ورځنیو لوبو کې د انګلستان لوبډله څلورم ده او د پاکستان لوبډله شپږم ځای کې ده.
په دواړو فارمټونو کې ترې د انګلستان لوبډله مخکې ده او ښایي چې دواړه لوبلړۍ انګلستان وګټي.
که چېري انګلستان دا لوبلړۍ وګټي، په درجه بندۍ کې مخکې کېږي او پاکستان شاته ځي.