د افغانستان د کرکټ ملي لوبډلې ته په ننګرهار کې تمریناتي کیمپ پیل شوی دی، چې پکې د ملي لوبډلې زیات شمیر لوبغاړو ګډون کړی دی.
د افغانستان د کرکټ بورډ د معلوماتو له مخې، ملي لوبډله ته د راتلونکي ۲۰۱۸ م کال د فیبرورۍ میاشت کې د زیمبابوې خلاف د ۲ شل اوریزه او ۵ پنځوس اوریزه کرکټ سیالیو ته د چمتوالي په موخه یې په ننګرهار کې تمریناتي کیمپ پیل کړی، چې پکې د ملي لوبډلې یو شمیر هغه لوبغاړي، چې په وروستیو کې د ملي لوبډلې څخه لیرې پاتې شوي دي، په دې تمریناتي کیمپ کې شامل شوی دي.
د کرکټ ملي لوبډلې څخه په لیرو پاتي شویو لوبغاړو کې حمید حسن، کریم صادق، میرویس اشرف او سمیع الله شینواری شامل دي.
دغه تمریناتي کیمپ په ننګرهار کې د هستي ګل عابد په شخصي اکاډمۍ کې پیل شوی دی، چې څلور ورځې به دوام وکړي او له دې وروسته به ملي لوبډله په غازي امان الله خان لوبغالي کې خپلو تمریناتو ته دوام ورکړي، چې ټولې ۱۵ ورځې دوام کوي.
افغان کرکټ ملي لوبډله به د راتلونکي ۲۰۱۸ م کال په دویمه فیبرورۍ میاشت کې د زیمبابوې خلاف په ۵ مه او ۶ مه د شل اوریزه او په ۹ مه، ۱۱ مه ، ۱۳ مه، ۱۶ مه او ۱۹ مه نیټو سره د ۵۰ اوریزه کرکټ یو ورځینیو سیالیو د لړۍ لوبې ترسره کړي.
