عامې روغتیا وزارت وایي، چې د دغه وزارت ولایتي رییسانو ته یې سپارښتنه کړې ده چې د کرونا ویروس د درېیمې څپې د خپرېدو پر وړاندې مبارزې ته چمتووالی ونیسي.
د روغتیا وزارت سرپرست وحید مجروح نن د ولایتونو د عامې روغتیا له رییسانو سره په انلاین لیدنه کې ویلي چې د کرونا وبا درېیمې څپې پر وړاندې باید پیاوړې مبارزې ته پوره چمتووالی ولري.
د دغه وزارت سرپرست د ولایتونو او کمیټو د رپوټونو تر اورېدو وروسته اړونده مسوولینو ته سپارښتنه وکړه چې د ولایتونو ستونزو د حل په موخه ژر تر ژره اقدامات وکړي.
عامې روغتیا وزارت ټینګار کړی دی چې د کرونا ضد واکسینو په تطبیق کې باید چټکتیا راوستل شي او خلکو ته دې د کرونا ویروس په اړه اړین پوهاوی ورکړل شي، څو خلک په دې برخه کې له دغه وزارت سره همکاري وکړی.
د یادونې ده چې د عامې روغتیا وزارت چارواکو تېره ورځ وویل چې هېواد د کرونا د درېیمې څپې له ګواښ سره مخ دی.
د یاد وزارت ویاند زیاته کړې، دوی د کرونا له تېرو څپو مهمې تجربې ترلاسه کړې او دا چې په ټوله نړۍ کې د دې وبا درېیمه څپه هم پیل شوې ده نو افغانستان هم له دې خطر سره مخ کېدلی شي.
یادو مسولینو همدا راز ویلي چې همدا اوس د کرونا ویروس د نوې بڼې ۷ مثبتې پېښې په جلال اباد ښار کې ثبت شوې نو ځکه دوی د هغو کسانو واکسین پيل کړي، چې له ایران او پاکستان افغانستان ته راځي.
عامې روغتیا وزارت د کرونا په تړاو د احتیاطي تدابیرو نه عملي کول هم د اندېښنې وړ مسئله بولي.
د یاد وزارت مسوولان زیاتوي که عام ولس احتیاطي تدابیرو ته پام ونه کړي ښایي مثبتې پېښې ډېرې شي.
تېره ورځ هم د عامې روغتیا وزارت ویلي وو، چې په هېواد کې پر کرونا وبا د اخته کسانو شمېر مخ په زیاتېدو دی.
سرچینې زیاته کړې چې یواځې د کرونا د نوي ډول ۱۱ مثبتې پېښې ثبت شوې دي.
