د ملا برادر په مشرۍ د طالبانو د قطر دفتر یو پلاوی ایران ته تللی دی.
ددغه دفتر ویاند ډاکټر نعیم په ټوېټ پیغامونو کې ویلي دي چې د ملا برادر په مشرۍ دغه پلاوی به له ایراني چارواکو سره د افغانستان د سولې او په سیمه کې د نورو روانو مسایلو په اړه خبرې وکړي.
نوموړی به همدا راز په ایران کې له مېشتو کډوالو سره ګوري او د ډاکټر نعیم په خبره له ایراني حکومت سره به د یادو کډوالو د ستونزو پر حل خبرې کوي.
په دوحه کې د طالبانو د سیاسي دفتر ویاند محمد نعیم زیاتوي، چې د دغه دفتر مشر ملا عبدالغني برادر د یوه پلاوي په مشرۍ د ایران په رسمي بلنه دغه هېواد ته تللی.
نوموړي ویلي، له دې سفر څخه یې هدف د سیمې له هېوادونو سره د اړیکو جوړول دي او دغه راز په ایران کې د افغان کډوالو د ستونزو اورېدل دي.
دا په داسې حال کې ده چې د قطر په پلازمینه دوحه کې د افغان حکومت او طالبانو ترمنځ دویم پړاو مذاکرات روان دي خو تراوسه یې لا کومه مثبته پایله نه ده راوتلې، او په هېواد کې جګړې هم ډېرې شدیدې روانې دي.
د یادونې ده چې ایران ته د ملا عبدالغني برادر دا لومړی ښکاره سفر دی تر دې وړاندې په ښکاره ډول ویل شوې نه دي چې ملا برادر دې ایران ته تللی وي خو د طالبانو پخوانی مشر ملا منصور څو ځله په ایران کې لیدل شوی او بلاخره کله چې نوموړي له ایرانه افغانستان ته پر لاره و په هرات کې د بې پیلوټه الوتکې په برید کې ووژل شو.
تردې وړاندې بیا ایراني چارواکو هم له طالبانو سره اړیکې لرل رد کړې او ویلي یې وه چې له طالبانو سره یوازې د افغانستان پر مسئله د مهم بحث کولو لپاره اړیکې لري خو په ایران کې د طالبانو د پټنځای په اړه نه د رد او نه یې هم د هو ځواب ورکړی او ویلي دي چې ایران کې د طالبانو د پټنځایونو په اړه دوی معلومات نلري.
د ملا برادر دغه سفر په ټولنیزو رسنیو کې د خلکو بیلا بیل غبرګونونه راپارولي دي ځینې دا سفر ګټور او ځینې د افغان سولې لپاره خطرناک بولې.
