د وسله والو طالبانو د قطر دفتر ویاند د امریکا د ولسمشر جو بایډن د ملي امنیت سلاکار څرګندونو ته په غبرګون کې ویلي چې دوی د د وحې هوکړې ته په بشپړه توګه ژمن دي او له امریکا هم دا تمه لري چې دغه هوکړې ته ژمن پاتې شي.
د بایډن د ملي امنیت سلاکار تېره ورځ له حمدالله محب سره د خبرو پر مهال ویلي چې دوی به د دوحې پر هوکړه له سره کتنه کوي او دا به ارزوي چې طالبان څومره دې هوکړې ته ژمن و او د دې هوکړې مواد یې څومره عملي کړي دي.
افغان حکومت بیا وایي چې طالبانو هوکړې ته هېڅ راز ژمنتیا نه ده ښودلې او برعکس تاوتریخوالی یې ډېر کړی دی.
د افغانستان د ملي روغې جوړې د عالي شورا مشر عبدالله عبدالله تېره ورځ ویلي وو چې په دې وروستیو کې طالبانوجګړې شدیدې کړي او دا یې د سولې پر وړاندې خنډ بللی دی.
طالبان داسې مهال د دوحې هوکړې ته ژمنتیا ښیي چې په دې ورړستیو کې په افغانستان کې جګړې زور اخیستی او خلک یې سخت اندېښمن کړي دي.
عام افغانان تر هر څه مخکې اوربند غواړي خو د دوی په خبره طالبان بیا له اوربند سره مخالفت کوي.
په دوحه کې د امریکا او طالبانو ترمنځ د سولې تړون، او بیا د بین الافغاني مذاکراتو پیلېدل د امریکا د پخواني ولسمشر ډونالډ ټرمپ په واکمنۍ کې ترسره او پیل شول، خو څو ورځې وړاندې د امریکا واک نوي ولسمشر جوبایډن په غاړه واخیست او د خپل کار له شروع سره سم یې د ډونالډ ټرمپ له خوا ځینې صادر شوي فرمانونه لغوه کړل.
خو په هغه فرمانونو کې د امریکا او طالبانو ترمنځ د سولې تړون او بین الافغاني مذاکرتو هم شامل دي چې د ډونالډ ټرمپ په دوره کې ترسره شوي دي خو لا معلومات نشته چې جوبایډن د دې تړون په اړه څه نظر لري.
د ۲۰۲۰ کال د فبرورۍ د میاشتې په وروستیو کې امریکا په دوحه کې له طالبانو سره د سولې تړون وکړ.
د دې هوکړې له مخې طالبانو ژمنه کړې وه چې له ترهګرو ډلو سره به اړیکي وشلوي، تاوتریخوالی به کم کړي او له افغان حکومت سره به ریښتیني خبرې وکړي.
که څه هم له دې تړون وروسته طالبانو پر بهرنیو ځواکونو کوم برید نه دی کړی، خو د افغان ځواکونو پرضد یې بریدونه روان دي او هغه هم په داسې مهال کې چې د طالبانو او افغان حکومت ترمنځ د سولې خبرې روانې دي.
