د افغانستان د ازادو او عادلانه ټاکنو بنسټ فیفا غواړي چې د ۱۴۰۰مالي کال بودجې پرسر د ولسي جرګې او افغان حکومت ترمنځ رامنځه شوی جنجال حل کړي.
د دې بنسټ مسوول محمد نعیم اصغري وايي، دوی ولسي جرګې او مالیې وزارت ته د دې ستونزې د حل په موخه طرحه ليږلې ده.
د نوموړي په خبره د یادې طرحې یو ټکی همدا دی چې ولسي جرګه دې د ۱۴۰۰ مالي کال بودجه په مشروط ډول تصویب کړي.
په ورته وخت کې د مالیې وزارت وایي، لا تراوسه دوی ته په رسمي توګه د فیفا طرحه نه ده رسیدلې.
د مالیې وزارت مطبوعاتي مسوول فرید نوښت وايي، د راتلونکې اوونۍ په لومړیو کې به د درېیم ځل لپاره ولسي جرګې ته د ۱۴۰۰ مالي کال بودجه د تصویب لپاره ولېږي.
دا په داسې حال کې ده چې ولسي جرګه د نوي مالي کال په بودیجه کې د ښوونکو د معاشونو پر لوړوالي ټينګار کوي خو د دې جرګې ځینې غړي وایي چې حکومت د دوی له دې پرېکړې سره مخالفت کوي.
د دې جرګې ځینې غړي وایي د ۱۴۰۰ کال په بودیجه کې د امتیازي معاشونو او اضافي لګښتونو لپاره د حکومت له لوري میلیاردونه افغانۍ ځانګړې شوي خو د ښوونکو د معاشونو لوړوالي برخه کې يې هېڅ بدلون نه دی راوستی.
د ولسي جرګې غړي بیا د ښوونکو او ځينو ټيټ پوړو مامورینو د معاش پر لوړولو ټینګار کوي.
دوی زیاتوي چې حکومت د خپلو سیاسي اړیکو لپاره د معاشونو ځانګړي سیستمونه رامنځ ته کړي دي چې د لوړپوړو چارواکو نږدې کسان لوړ او غیر عادلانه معاشونه اخلي.
دوی ټینګار کوي چې باید د مامورینو په معاشونو کې عدل رامنځته شي او په ځانګړې توګه د ښوونکو معاشونه باید لوړ کړل شي.
دولسي جرګې غړي وایي دا د دوی مسوولیت دی چې د هر افغان د حق غوښتنې برخه کې کار وکړي او له حقونو یې دفاع وکړي.
کلونه کیږي چې د ښوونکو دمعاشونو د لوړوالي چيغې وهل کېږي خو حکومت سره له دې چې ژمنې یې کړي خو عملي اقدام یې تر اوسه نه دی کړی.
د نظرخاوندان هم په دې برخه کې پر حکومت نيوکې لري او وايي حکومت باید د ښوونکو د معاشونو لوړوالي ته لومړيتوب ورکړي.
