لیکنه: محمدصابر حمیدي
د پرتګال هیواد د فوټبال ملې لوبډلې او یوونټوس کلب تکړه او نامتو لوبغاړی کریسټیانو رونالډو په کورونا ویروس اخته شوی، چې له امله یې د فوټبال مهمې سیالۍ له لاسه ورکړې.
رونالډو د خپلې ملې لوبډلې سره په هیوادنیو لوبو بوخت وو، چې پرون سې شنبه یې د کورونا پایله مثبته وخته او د قرنطین په موخه یې خپله لوبډله پرېښودله.
د ریپوټونو په اساس رونالډو اړ دی، چې ۱۴ ورځې قرنطین تېر کړي.
د پرتګال فوټبال فدراسیون د یوې خبرپاڼې په خپرولو سره دا خبر تایید کړی او ویلي یې دي، چې د رونالډو حالت ښه دی او د کورونا هیڅ علایم پکښي نه دي موجود.
د سکای سپورټ ترڅنګ مشهورو ورزشي سایټونو هم دا خبر تایید کړی دی.
BREAKING: Cristiano Ronaldo leaves Portugal squad after a positive test for coronavirus
— Sky Sports News (@SkySportsNews) October 13, 2020
رونالډو کومې لوبې له لاسه ورکړې؟
دا چې رونالډو به د کورونا له امله ۱۴ ورځې قرنطین کې وي، نو د هیواد لپاره یې یوه لوبه او د کلب لپاره یې بیا دوې لوبې له لاسه ورکړې.
د اروپايي هیوادونو ترمنځ د فوټبال کپ کې پرتګال د سویډن په وړاندې نن لوبه لري، چې دې لوبه کې رونالډو نشته.
او یوونټوس کلب د کروتون او دیناموکیف لوبډلو سره جلا ـ جلا سیالۍ لري، چې په هغه لوبو کې به هم ونه لوبیږي.
۱۵ ورځې وروسته یوونټوس کلب د نړۍ له نامتو لوبډلې بارسلونا سره په چمپېنزلیګ کې لوبه لري، داسي شک کیږي، چې رونالډو به په هغه کې هم ونه لوبیږي.
رونالډو
رونالډو د فوټبال په ډګر کې یو له نامتو فوټبالرانو څخه دی، چې په زیات شمېر سره یې بیلابیلې جایزې ګټلې.
هغه د بهرنیو هیوادونو ترڅنګ دلته افغانستان کې هم ګڼ شمېر مینوال لري.
کورونا او د فوټبال لوبغاړي
له کله چې کورونا ویروس په ټوله نړۍ کې خپور شو، نو ورسره جوخت د فوټبال لوبې هم ودرېدې او په زیات شمېر سره د فوټبال لوبغاړي هم په کورونا اخته شول.
خو د قرنطین تر تېرولو وروسته ټول لوبغاړي بیرته روغ شول او یوځلې بیا د فوټبال سیالۍ په لوبغالو کې له مینهوالو پرته پيل شوې.
له کله چې لوبې بیرته پيل شوي، د کوم لوبغاړي مثبته پایله نه وه راوتلې، خو د نامتو لوبغاړي رونالډو پایله تېره ورځ مثبته وختله.
