راپور: بشر درویش
د افغان ولسمشر محمداشرف غني په حضور کې په افغانستان کې د هند د سفیر او اغاخان انکشافي شبکې ډیپلوماټیکې استازې ترمنځ د کابل بالاحصار تاریخي برخو د تحکیماتو او مرمت تفاهم لیک لاسلیک شو.
ولسمشرۍ ماڼۍ یوه خبرپاڼه کې ویي؛ په دغو مراسمو کې چې پرون ماسپښین په همدې مناسبت په ارګ کې ترسره شول د یاد تفاهم لیک تر لاسیک وروسته په افغانستان کې د هند سفیر وینی کمار وویل، کابل بالاحصار د افغانستان له تاریخي ځایونو څخه دی او هند د تاریخي ځایونو بیارغاونې ته لیوال او د افغانستان تر څنګ قرار لري.
هغه زیاته کړه:
«هند د سوله ییز، هوسا او پرمختللي افغانستان غوښتونکی دی او هیله لرم دغه پروژه په بریالي ډول پایته ورسېږي.»
سرچینې ویلي؛ وروسته د اغاخان انکشافي شبکې ډیپلوماټیکې استازې شهیره زاده هرجي وویل، د اغاخان انکشافي شبکې فرهنګې برخه د تاریخي ځایونو د بیارغاونې او مرمت په برخه کې د افغانستان په مرکز او ولایتونو کې فعالیت لري او په دې برخه کې بېلابېلې پروژې جریان لري.
تاریخي ځایونه او ویاړ
ولسمشر غني په دې مراسمو کې ویلي چې تاریخي ځایونه، زموږ ویاړلی تېر موږ ته بیانوي، د دغو تاریخي ځایونو احیا نه یواځې له تېر سره زموږ اړیکې په ډاګه کوي، بلکې ددې هیواد د عظمت تصویر راتلونکو نسلونو ته لېږدوي.
جمهوررئیس زیاته کړه:
«کابل بالاحصار یو سمبول نه، بلکې یو تاریخي یادګار دی چې د سترو کارونو د ترسره کولو په خاطر زموږ د خلکو مبارزې او وړتیاوې څرګندوي.»
ښاغلي غني افغانستان سره د هند له مرستو مننه وکړه وې ویل، هند د عمراني کارونو په برخه کې زموږ ښه همکار دی. همداراز هند د جمهوریت او نورو هغو ارزښتونو په دفاع کې مرسته کوي چې موږ یو بل ته نږدي کوي.
ولسمشرۍ ماڼۍ ویلي؛ د هیواد جمهوررئیس همدارنګه د بهرنیو چارو وزارت ستوري ماڼۍ او بابر بڼ د بیارغاونې په خاطر د اغاخان انکشافي شبکې او په ټولو برخو کې د دغه بنسټ د مرستو مننه وکړه او هیله یې وښوده چې کابل بالاحصار دوباره د افغانستان د فرهنګي او تاریخي جاذبو پر مهمه سیمه بدل شي.
د یادولو وړ ده چې د کابل بالاحصار تاریخي سیمو د بیارغاونې او مرمت پروژه د هند جمهوریت په مالي مرسته د اغاخان انکشافي فرهنګې شبکې په مټ تطبقېږي.