د سریلانکا او ویسټ انډيز کرکیټ ملي لوبډلو ترمنځ د سریلانکا په کوربتوب د ۲ شل آوریزه سیالیو د لړۍ څخه ئې پرون چهارشنبه لومړۍ شل آوریزه لوبه ترسره سوه، چي پکښي میلمه لوبډلي ویسټ انډيز کوربه لوبډلي سریلانکا ته په ۲۵ منډو توپير ماته ورکړه.
په یاده لوبه کي لومړی ویسټ انډیز توپوهنه وکړه، چي په ټاکلو ۲۰ آورونو کي ئې د ۴ لوبغاړو په سوځېدو سره سریلانکا ته د ۱۹۷ منډو هدف وټاکه.
د ویسټ انډیز لپاره په یاده لوبه کي سیمونز ۶۷ ناسوځېدلي، انډری رسل ۳۵، پولارډ ۳۴، کینګ ۳۳ او پوران بیا ۱۴ منډي جوړي کړې.
د سریلانکا لپاره بیا ملینګا، اسورو اودانا، لکشان سنداکان او هسرنجا یوه یوه ویکیټه واخیستله.
کله چي د سریلانکا لوبغاړي د هدف پوره کولو لپاره میدان ته کښته سول، نو د ټولو لوبغاړو په سوځېدو سره ئې د لوبي په ۱۹،۱ آورونو کي ۱۷۱ منډي جوړي کړې او د ۲۵ منډو په توپير ئې په لومړۍ شل آوریزه لوبه کي ماته وخوړه.
د سریلانکا لپاره کوشان پریرا ۶۶ او هسرنجا بیا ۴۴ منډي جوړي کړې.
د ویسټ انډیز لپاره بیا اوشېن توماس ۵، رومان پاول ۲، خو کوټریل، رسل او براوو بیا یوه ـ یوه ویکیټه واخستله.
ټاکل سوې دا دوه هیوادونه دوهمه او وروستۍ شل آوریزه لوبه سبا د جمعې په ورځ ترسره کړي.
ویسټ انډیز او سریلانکا ملي لوبډلو تر دې مخکي د ۳ یو ورځنیو لوبو لړۍ ترسره کړه، چي هغه ټولي لوبي کوربه سریلانکا وګټلې او لړۍ ئې د ویسټ انډیز څخه خپله کړه.