دا ورزشي جمنازیم د یوه کندهاري تجار لخوا د یوه کال په موده کي جوړ سوی او پکښي ۲ زره نندارچیان ځایږي.
د یاد جمنازیم مسئول جمال ناصر طرزي یاران ته وویل، چي په یاد جمنازیم کي به د فوټسال ترڅنګ د والیبال، باسکیټبال، غیږنیوني او ګڼ شمېر نوري لوبي هم ترسره سي.
د طرزي په خبره، چي یاد جمنازیم ئې پر نړیوالو معیارونو برابر حوړ کړی.
یاد مسئول وویل، چي پر یاد جمنازیم ئې ټوله خپله په شخصي ډول پانګونه کړې او موخه ئې ورڅخه هیوادوالو، لوبغاړو او مینوالو ته د ورزش له لاري خدمت کول دي.
دغه جمنازيم د پنجشنبې په ورځ دګڼو سپورټمينانو په ګډون د ملي سوداګرو له لوري د پټۍ په پريکولو سره پرانيستل سو.
په ورته وخت کي د سپورټ او بدني روزني مسئول مدير اغا په سپورټي ډګر کي د ياد جمنازيم جوړېدل يوه ښه لاسته راوړنه ګڼي او پر نورو ملي سوداګرو هم ږغ کوي، ترڅو په سپورټي برخه کي پانګونه وکړي.
دا جمنازیم پر داسي مهال پرانیستل کیږي، چي راتلونکو څو ورځو کي یو بل سپورټي جمنازیم هم د محمدي په نوم د کندهار په عینو ښار ګوټي کي د یوه شخصي تجار لخوا ګټي اخیستني ته سپارل کیږي.
دا مهال کندهار کي څلور نور جمنازیمونه هم شتون لري، چي ټول ئې تجارانو جوړ کړي، خو دولت تراوسه ندی توانېدلی کندهار کي یو سپورټي جمنازیم جوړ کړي.