ليکنه: سميع الله درانی
د کرکټ په نړۍ کې داسې لوبغاړي هم شته، چې په خپلو بدو اخلاقو یې د خلکو زړونه مات کړي دي؛ خو د دوی اپوټه ( برعکس) داسې لوبغاړي هم شته، چې په ښو اخلاقو یې خلک د ځانونو په ستاینه اخته کړي دي.
دلته لس هغه لوبغاړي درپېژنو چې د کرکټ په معصر تاریخ کې یې غوره اخلاق درلودل او یا یې اوس هم لري.
راهول ډراوېډ
د هندوستان غوره توپ وهونکی و، دی د ښې لوبې کولو ترڅنګ د ښو اخلاق څښتن لوبغاړی هم و، نوموړی په آې پي ایل کې د راجستان لوبډلې لوبډلمشر هم پاتې شوی او له ډوني وړاندې د هندۍ لوبډلې لوبډلمشر هم و؛ په خپله لوبډلمشرۍ کې یې له لوبغاړو او لوبڅارانو سره هیڅ زشت چلند نه دی کړی.
نوموړی یو له هغو لوبغاړو دی، چې د غوره ورزشکارانو په نوملړ کې شامل دی.
ایم ایس ډوني
د ایم ایس ډوني د نوم په اخېستلو سره د هغه عاجزه څېره د خلکو ذهنونو کې انځورېږي، ډوني چې د هندۍ لوبډلې هيټر توپ وهونکی دی او له ۲۰۰۷ م کال څخه د نوموړې لوبډلې لوبډلمشر هم و؛ په لوبغاړو کې د غوره اخلاقو څښتن و.
د سپورټس کیډا په نامه وېب پاڼه وایي، د هغه ټول تصمیمونه معقول وو، له لوبغاړو او لوبڅارانو سره یې د خپل کرکټ په دنده کې هیڅ ډول لانجه نه ده راغلې.
کله چې یې له لوبغاړو لوبه کاواکه شي، یواځې سترګې رپوي او بس.
کومار سېنګاکارا
د سریلانکا کیڼ لاسی توپ وهونکی او لوبډلمشر و، د غوره لوبغاړي ترڅنګ د غوره اخلاقو څښتن هم و؛ هغه خورا ارام لوبغاړی و او د هیڅ لوبغاړي پر وړاندې یې ناسم چلند نه کاوه.
مایکل هسي
د اسټرالیا کیڼ لاسی توپ وهونکی و، ده ته یې یو وخت کې د کرکټ په نړۍ کې د چېسېنګ یا د منډو د پوره کولو ماشین وایه، ده د اسټرالیا لپاره په منځنۍ برخه کې توپ وهنه کوله او ډېری وختونه به یې د لوړو اړتیا منډو په پوره کولو کې مثبت رول لوباوه، ده ته د کرکټ ماسټر ویل کېده او علاقه مند اخلاقي لوبغاړي باندې هم مشهور و.
انډریو فلېن ټاف
ډېری خلک ښایي دا ونه مني، چې انګلستانی انډریو فلېن ټاف دې، د غوره اخلاقو لوبغاړی وي، د سپورټس کيډا وېب پاڼه وایي، هغه خورا مهربانه لوبغاړی و.
موتیاه مورالي تارن
د سریلانکا ډېر خطرناک سپېن توپ اچوونکی و، که څه هغه ځېنې وختونه تېروتنې کړي دي، خو په ډېری ټولنیزو مسئلو کې یې ګډون د دې لامل شو، چې هغه د خواخوږو او غوره اخلاقو لرونکو لوبغاړو په قطار کې راولي.
اجېنکیا رهانی
اجېنکیا رهانی د هندۍ لوبډلې ټاپ ارډر توپ وهونکی دی، هغه د ارام طبیعت څښتن دی، سینه یې پراخه او حوصله یې ستره ده، په هر حالت کې ترې لوبغاړي بده خاطره نه لري.
اوسمهال په آې پي ایل سیالیو کې د راجستان لوبډلې لوبډلمشر دی.
سورېش رېنا
سورېش رېنا د هندۍ لوبډلې کیڼ لاسی توپ وهونکی و، په ډېری لوبو کې یې د هند لپاره د هیټر رول لوباوه او د ښې توپ وهنې ترڅنګ د مناسبو اخلاقو څښتن لوبغاړی هم دی.
ډانیئل وېټوري
ډانیئلل وېټوري د نیوزلېنډ کیڼ لاسی توپ وهونکی، سپېن بالر او پخوانی لوبډلمشر دی، د ده د اخلاقو په اړه همدومره کافي دي، چې دوه ځلې یې د غوره اخلاقو کرکټ لوبغاړي جایزه ترلاسه کړې ده.
سچېن ټېنډولکر
د سلو سلیزو پاچا ټېنډولکر د هندۍ لوبډلې ټاپ ارډر توپ وهونکی و، هغه له ښوونځي دورې نیولې تر کرکټ پورې له چا سره بده رویه نه ده کړې او تل یې له نرمۍ کار اخېسته.