راپور: صابر حمیدي
تیره دوشنبه په ننګرهار ولایت کي سپين غر بازانو فوټبال لوبډلي ته د لوبغاړو ټاکنیزي سیالۍ پيل سوې.
په ننګرهار ولایت کي ددې سیالیو مسئولین وايي، چي ددې سیالیو په پاي کښي به ۲۱ غوره لوبغاړي د سپين غربازانو فوټبال لوبډلي ته غوره سي.
د افغانستان فوټبال فدراسیون پر رسمي فیسبوک پاڼه ویل سوي، چي ددې سیالیو په لومړۍ ورځ نورستان ۱ ګول پر ۰ لغمان ته او ننګرهار آرمان لوبډلي بیا ۲ ګولونه پر ۰ ننګرهار اُمید لوبډلي ته ماته ورکړه.
نن بیا ددې ټورنمنټ په لړ کي ننګرهار آرمان ټيم له نورستان سره او ننګرهار اُمید لوبډله بیا د لغمان سره لوبیږي.
ددې سیالیو موخه داده، چي سپين غر بازانو فوټبال لوبډلي ته ۲۱ غوره لوبغاړي وټاکل سي.
یاد لوبغاړي د کابل څخه د ورغلي پلاوي له لوري ټاکل کیږي.
سپين غر بازان د افغانستان د فوټبال غوره لیګ له ګډونوالو ټیمونو څخه یو ټیم.
په افغان غوره لیګ کي اته لوبډلي سپین غربازان، میوند اتلان، شاهین آسمايي، سیمرغ البرز، طوفان هرېرود، موجهای آمو، د آباسین څپې او عقابان هندوکش لوبډلي دي، چي تر دې دمه میوند اتلانو، طوفان هرېرود، شاهین آسمايي او سیمرغ البرز لوبډلي ته د لوبغاړو ټاکنیزي سیالۍ په بیلابیلو ولایتونو کي ترسره سوي.
د افغانستان د فوټبال فدراسیون چارواکو څه موده مخکي د فوټبال غوره لیګ د اتم پړاو سیالیو د ژر پېلیدو خبر ورکړ، خو د دقیق وخت په اړه ئې تراوسه څه ندي ویلي.
په دې لیګ کي ۴ ځلي شاهین آسمايي، دوه ځلي طوفان هریرود او یو ځلي بیا د سپين غربازانو لومړی مقام خپل کړی.