که ضیاالحق د (جهاد افغانستان، دفاع پاکستان) لوبه پیل کړه او نواز شریف خپله لویه کارنامه د افغان پوځ تس نس کول وګڼل، یا بینظیر بوټو د طالبانو ډله جوړه او ظاهراً د تحریک طالبان پاکستان په لاس ووژل شوه، نو پرویز مشرف هغه څوک و، چې د طالب واکمنۍ له سقوط وروسته یې افغانستان بیا د تودې جګړې میدان کړ.
دا پخوانی پوځي دیکتاتور اوس له پاکستانه جلا وطن او د ځنکدن شېبې هم په پردي وطن کې تېروي.
د مشرف تازه حال
پرویز مشرف، چې له څو کلونو راهیسې له پاکستان څخه د درملنې په نوم تښتیدلی او په دوبۍ کې جلا وطنه دی، اوس له مرګ سره لاس و پنجې نرموي.
د هغه ډاکټرانو له څو کلونو راهیسې ویلي، چې دی په یوه صعب العلاجه ( نه رغیدونکې) ناروغۍ اخته دی.
مشرف د دوبۍ په یوه روغتون کې د ځانګړي مراقبت لاندې دی او هره شېبه یې د مړینې وړاندوینه کیږي.
ډاکټرانو ویلي، چې مشرف په یوې نادرې ناروغۍ اخته دی او هره شېبه پرخپلو ټولو عضلاتو د کنټرول بایللو له خطر سره مخ دی.
خو د مشرف نیږدې کسانو ویلي، چې ناروغي یې په ښه کیدو ده او زر به روغتون نه رخصت واخلي.
پر سیاست بندشوی جنرال
د پاکستان د دغه پخواني پوځي دیکتاتور ډاکټرانو ویلي، چې که مشرف روغ صحت غواړي، له سیاسته دې ځان لیرې ساتي.
دا پخوانی پاکستانی جنرال په ۱۹۹۹ کې د یوې پوځي کودتا له لارې واکمن او نواز شریف یې له واکه ګوښه کړ.
هغه تر ۲۰۰۸ پورې پرپاکستان واکمني وکړه، خو ترهغې وروسته د پخوانۍ صدراعظمې بینظیر بوټو په وژلو کې د لاس لرلو او هم د اساسي قانون د پراخ نقض له کبله زنداني شو.
مشرف په وروستیو کلونو کې د درملنې په نوم له زندان او بیا پاکستان څخه بهر ته لاړ او نور له ډاره بیرته ستون نه شو.
له بدې خاتمې سره مخ سړی
مشرف د ژوند په وروستیو کې ترټولو ډانګ پېیلې او د زړه خبرې وکړې.
هغه څو اونۍ وړاندې په یوه مرکه کې له اسراییلو سره د پاکستان پر ژورو اړیکو ټینګار وکړ.
د ده په وینا اسراییل کولای شي د پاکستان اټومي پروګرام خوندي او ساتنه یې وکړي.
د هغه دا خبرې په پراخه کچه د یو شمېر اسلامي ډلو له توند غبرګون سره مخ شوې.
دغه پاکستاني جنرال ته، چې په افغانستان او نورو سیمو کې یې د خپلو استخباراتي اهدافو لپاره خلک د خپلو مسلمانو نظامونو خلاف جنګول، د مرګ پر بستر ان له اسراییلو سره د اړیکو په بیه د پاکستان ګټې مهمې وې.