د افغانستان د کرکټ ملي لوبډلې پیاوړي الراونډر محمد نبي عیسی د انګلستان په بلاسټ ۲۰ اوریزه کرکټ سیالیو کې د خپلې چټکې بهترینې لوبې پرمټ لیسټر شایر لوبډله بریا ته ورسوله.
افغان لوبغاړي محمد نبي عیسی خیل د لیسټر شایر لوبډلې په ګټه د لینکا شایر خلاف په سیالۍ کې لمړی خپل ۴ اورونه ترسره کړل، چې د ۳۱ منډو په ورکولو سره یې کومه ویکټ ترلاسه نکړه، خو په توپ وهنه کې یې د لیسټر شایر لوبډلې بریا یقیني کړه.
د لیسټر شایر خلاف د لینکا شایر لوبډلې د لوبې په ټاکلو ۲۰ اورونو کې د ډیویس د ۹۴ منډو پرمټ ټولې ۱۹۰ منډې جوړې کړې او خپلې سیالې لوبډلې ته یې د ۱۹۱ منډو هدف ورکړ.
د توپوهنې ویډیو؛
https://www.facebook.com/Nasratullahomarzai1/videos/826877820839064/
د لیسټر شایر لوبډلې لخوا د لوبې په ځوابي توپ وهنه کې کې افغان لوبغاړي په ۳۲ بالونو د ۸ شپږیزو او ۴ څلوریزو پر مټ ۸۶ ناسوځیدلې منډې جوړې کړې او لوبډله یې بریا ته ورسوله.
افغانستان د کرکټ د ملي لوبډلې او په نړیوال کرکټ کې مشهوره الراونډر محمد نبي عیسی خیل د انګلستان په ۲۰ اوریزه کرکټ تجارتي سیالیو کې د دوه نورو افغان لوبغاړو راشد خان او مجیب ځدران سره یو ځای ګډون کړی دی، چې پکې دی تر نورو ښه ځلیدلی دی.
د انګلستان د بلاسټ په نوم ۲۰ اوریزه کرکټ تجارتي سیالیو کې محمد نبي عیسی خیل د لیسټر شایر، راشد خان د سسیکس او مجیب ځدران د همپشایر لوبډلې لپاره لوبیږي.
دا لمړی ځل دی، چې د انګلتسان په ۲۰ اوریزه کرکټ تجارتي سیالیو کې ۳ افغان لوبغاړو ګډون کړی دی او د بېلابیلو لوبډلو لخوا لوبیږي.
د ټولنیزو رسینو یوه فعال اباسین حرکت شینواري د محمد نبي د ټویټ یو سکرین شاټ راخیستی او ورسره یې لیکلي: ملي لوبډلې دوو لوبغاړو راشد خان او ګلبدین نایب، محمد نبي ته د ښې لوبې مبارک ورکړې چې محمد نبي بیرته ورته په ځواب کې لیکلی چې (ایله مې د زړه بړاس وویستو)
