د نیپال د کرکټ ملي لوبډلې الراونډر لوبغاړي شکتي ګوچن د نړیوال کرکټ نه د څنګ ته کیدو خبر ورکړ.
نوموړي ویلي وخت را رسیدلی دی، چې نور نړیوال کرکټ نه څنګ ته شي او د کرکټ په لارډز نړیوال لوبغالي کې به یې راتلونکې سیالۍ په نړیوال کرکټ کې وروستۍ وي.
د نیپال د کرکټ ملي لوبډله د انګلستان په لارډز کې د ام سي سي کلب او هالینډ د کرکټ ملي لوبډلې سره د ۲۰ اوریزه سیالیو په درې اړخیز سیریز کې ګډون کوي، چې د همدې روانې جولاي میاشتې په ۲۹ مه نیټه پیلیږي.
همدا راز نیپالۍ لوبډله به انګلستان ته په دې سفر کې د هالینډ کرکټ ملي لوبډلې سره دوه پنځوس اوریزه کرکټ لوبې هم ترسره کړي، چې د راتلونکې اګسټ میاشتې په لمړۍ او دریمه نیټو سره ترسره کیږي او پکې شګتي ګوچن خپل نړیوال کرکټ پای ته ورسوي.
۳۴ کلن شګتي ګوچن د خپلې هېواد د کرکټ په ملي، ۱۹ کلنې او ۱۷ کلنې لوبډلې کې لوبیدلی دی، چې د ۲۰۰۲ م کال راهیسې یې د نیپال لپاره کرکټ پیل کړی و.
شګتي ګوچن د نیپال د کرکټ په تاریخ کې لمړنی توپ اچونکی دی، چې لمړنی هیټریک يې په خپل نوم کړی دی.
همدا راز نوموړی د کرکټ اسیايي شورا په ټورنمنټ کې د نیپال لپاره هغه لوبغاړی شمیرل شوی دی، چې ۱۰۰۰ منډې یې پوره کړې دي او هم یې دوه سلیزې جوړې کړې دي.
نوموړي د کرکټ نړیوالې شورا سره په مرکه کې ویلي د خپلې خوښې لوبغاړی یې نیوزیلنډی د سپین بالینګ ماسټر بالر ډینل ویټوري دی، چې تل یې څارلی دی.
شګتي ګوچن د نړیوال کرکټ په ۹ شل اوریزه، ۴ فرسټ کلاس او ۲۳ لیسټ ای سیالیو کې لوبیدلی دی، چې د توپ وهنې په نسبت په توپ اچونه کې ښه ځلیدلی دی او په درې واړو فارمټونو کې یې ۳۱ ویکټې ترلاسه کړې دي.