راپور: بشر درویش
بادغیس، بدخشان، سمنګان، غزني او کونړ کې د یو زر او ۸۱۵ پروژو چارې پیل شوې.
د کرنیزو محصولاتو مدیریت د برنامې د پیل په دوام، د یادې برنامې چارې پرون د بادغیس، بدخشان، سمنګان، غزني او کونړ په ولایتونو کې هم پیل شوې.
په یادو ولایتونو کې د یوزر او ۸۱۵ کرنیزو پروژو د بنسټ ډبره کېښودل شول.
د کرنې وزارت یوه خبرپاڼه کې لیکلي:
«د بادغیس په ولایت کې ۳۷۰ پروژې، بدخشان کې ۲۰۵ پروژې، په سمنګان کې ۳۶۰ پروژې، غزني کې ۷۷۰ پروژې او په کونړ کې ۱۱۰ پروژې پلي کيږي.»
بادغیس او ۳۷۰ پروژې
ټاکل شوې، چې په بادغیس ولایت کې د ۳۷۰ پروژو له ډلې ۴۰ ممیزخونې، د پیازو او کچالو ۲۹۰ زېرمتونونه او ۱۰ صفر انرژۍ سارک سړې خونې جوړې شي او پر بزګرانو او بڼوالو د سبو او مېوو ۳۰ لمریز وچوونکي دستګاوې ووېشل شي. د بادغیس د پروژو ټولیز لګښت ۲۱۴ میلیونه او ۹۶۶ زره او ۵۱۰ افغانۍ ده.
بدخشان کې ۲۰۵ پروژې
دغه راز په بدخشان کې د ۲۰۵ پروژو په ډله کې د پیازو او کچالو زېرمتونونه او صفر انرژۍ سړې خونې جوړول او د مېوو او سبو وچوونکي آلې وېشل شامل دي.
د کرنې وزرات وايي:
«دغه پروژې د کرنیزو محصولاتو مدیریت د برنامې تر چتر لاندې د کرنې وزارت له خوا پلي کیږي، چې ټولیز لګښت یې ۱۷۶ میلیونه او ۶۰۰ زره افغانۍ ده.»
سمنګان او ۳۶۰ کرنیزې پروژې
په سمنګان کې د ۳۶۰ پروژو له ډلې د پیازو او کچالو ۲۵۰ زېرمتونونه او د مېوو ۱۰ صفر انرژۍ سارک سړې خونې جوول او پر بزګرانو او بڼوالو د سبو او مېوو ۱۰۰ لمریز وچوونکي دستګاوې وېشل شامل دي.
جګړه ځپلی غزني او ۷۷۰ پروژې
د غزني په ولایت کې ۷۷۰ پروژې پلي کیږي، چې په دغو پروژو کې بزګرانو او بڼوالو لپاره ممیزخونې جوړول، د پیازو او کچالو زېرمتونونه جوړول او د مېوې د زېرمه کولو په پارصفر انرژۍ سارک سړې خونې جوړول شامل دي. دغه راز ددې طرحې په اډانه کې د سبو او مېوو وچوونکي دستګاوې، چې په لمریزه انرژۍ کار کوي، د غزني پر بزګرانو او بڼوالو وېشل کیږي.
یاد وزارت ویلي:
«د بادغیس، بدخشان، سمنګان، غزني او کونړ ولایتونو بزګران، بڼوال او سیمه ییز چارواکي د کرنیزو محصولاتو د مدیریت په پار د کرنې له وزارت څخه مننه کوي او وایي، چې یاد کرنیز بنسټونه د بزګرانو او بڼوالو د تلپاتې اقتصادي ودې لامل کیږي.»
د ولسمشر له لورې تائید شوې طرحه
د کرونا په پېر کې د کرنیزو محصولاتو د مدیریت طرحه د کرنې وزارت له خوا چمتو او د ولسمشر محمداشرف غني او عالي اقتصادي شورا له خوا منظور شو.
دغه طرحه، د بڼوالو او بزګرانو اړتیاوو ته په کتو، د دوی لپاره کرنیز بنسټونه جوړوي. بزګران او بڼوال د دغو بنسټونو د جوړولو یوازې ۱۰ سلنه لګښت ورکوي او ۹۰ سلنه نور لګښت یې د کرنې وزارت له خوا ورکول کیږي.
ددې طرحې په اډانه کې، په بېلابېلو ولایتونو کې بڼوالو او بزګرانو لپاره زرګونه ممیزخونې، د پیازو او کچالو زرګونه زېرمتونونه او د مېوو د ساتنې په پار سلګونه صفر انرژۍ سارک سړې خونې جوړیږي. دغه راز ددې برنامې پر اساس، پر بڼوالو او بزګرانو د مېوو او سبو زر وچوونکي آلې هم وېشل کیږي.
دغه طرحه د روان مالي کال تر پایه په بشپړه توګه عملي کیږي او د پلي کېدو پر وخت او له هغه وروسته زرګونو کسانو ته د کار زمینه برابروي.