د کرکټ نړیوالې شورا لخوا هر کال وروسته په نوي کال کې د کرکټ په ډګر کې د ځلیدونکو لوبغاړو لپاره جایزې ډالۍ کیږي، چې دا ځل د تیر ۲۰۱۸ م کال د لوبغاړو نومونه هم په ډاګه شول.
په اعلان شویو جایزو کې د هندوستان د کرکټ ملي لوبډلې لوبډلمشر ویرات کوهلي د دویم ځل لپاره د کال د غوره کرکټر جایزه خبله کړې ده.
د اعلان شوو جایز نوملړ:
۱ – هندي لوبډلمشر ویرات کوهلي د کال غوره لوبغاړي ترڅنک، د ټیسټ یا ۵ ورځینیو او د یو ورځینیو لوبو د کال د غوره کرکټر جایزه خپله کړې ده.
۲ – نیوزیلینډي لوبډلمشر کین ویلیمسن د سپریټ اف کرکټ لوبغاړي په توګه جایزه خپله کړې ده.
۳ – اسټرالوي لوبډلمشر ایرون فینچ په ۲۰ اوریزه سیالیو کې د ښې کارکردګۍ په اساس د کال د غوره کرکټر جایزه ګټلې ده.
۴ – د هند د کرکټ ملي لوبډلې ځوان چپ لاسی توپ وهونکی ریشاب پانټ د ایمیرجینګ یا ځوان غوړیدونکې لوبغاړي جایزه ګټلې ده.
۵ – د سکاټلینډ د کرکټ ملي لوبډلې توپ وهونکي کالم میکلیوډ د دویمې درجې هېوادونو د غوره کرکټر جایزه ګټلې ده.
۶ – د لوبڅارۍ په برخه کې سریلنکايي کماره درمسینا د کال د غوره لوبڅآر جایزه ګټلې ده.
د دغه اعلان شویو جایزو په بهیر کې د ټیسټ او۵۰ اوریزه سیالیو د کال غوره لوبډلې هم اعلان شوې دي، چې د ۵۰ اوریزه وریزه سیالیو په نوملړ کې افغان لوبغاړي راشد خان نوم هم شامل دی.
