د سنجي دت او پوجا بټ په ۱۹۹۱ کال کې خپور شوی رومانوي فلم “سړک”، لا هم د خلکو یاد دی. سړک فلم نه یوازې دا چې خوندورې سندرې درلودې، بلکې د فلم کیسه هم ځانګړې او خوندوره وه چې له امله يې هغه وخت د کال تر ټولو فلمونو ډېره ګټه کړې وه.
په دې فلم کې سنجي دت او پوجابټ مرکزي رولونه لوبولي او په فلم کې د دواړه ترمنځ د مینې کیسه اوس هم د فلم لیدونکو ته ټکي ټکي یاده ده.
تېر کال هندي رسنیو خبرونه خپاره کړل چې د “سړک” فلم دوهمه برخه باندې کار پیلیدونکی دی، خو اوس تازه هندي رسنیو راپورونه خپاره کړي دي چې د سړک فلم په دوهمه برخه “سړک ۲” کې به پوجا بټ او سنجي دت یو ځل بیا ۲۶ کاله وروسته یوځای لوبیږي.
د راپورونو له مخې په “سړک ۲ “ کې به یو ځل بیا سنجي او پوجا د مینې خواږه پر خپلو مینه والو وشیندي، خو دا ځل به سنجي دت او پوجا بټ د فلم په مرکزي رولونو کې نه بلکې په مرستیال رولونو کې راښکاره شي.
د راپورونو پر وینا، “سړک ۲ “ کې په ښځینه مرکزي رول کې به د پوجا بټ خور علیه بټ لوبیږي او د نارینه مرکزي رول کې به سدرهارت ملهوترا لوبیږي.
راپورونه زیاتوي چې د فلم لاروښونې چارې هم خپله پوجا بټ مخکې وړي، ځکه چې د هغې پلار مهیش بټ د فلمونو د لاروښونکي په توګه نور کار نه کوي او تقاعد شوی دی.
دا هم ویل کیږي، چې په سړک ۲ فلم د سړک فلم ځينې سندرې چې د خپل وخت مشهورې سندرې وې، ریمک به شي او په فلم “سړک ۲ “ کې به شاملې شي.