د پاکستان د کرکټ ملي لوبډلې پخوانی الراونډر عبدالرازاق یو ځل بیا د کرکټ ډګر ته راستنیږي.
د کرکټ نړیوالې شورا ویب پاڼې سره په خبرو کې دغه پاکستاني کرکټ ویلي دي، د پاکستان ټلویزیون «PTV» سره د تړون له مخې به په راتلونکې قاید اعظم ټرافي سیالیو کې ولوبیږي.
نوموړي ویلي، چمتو دی، چې یو ځل بیا د کرکټ ډګر ته راستون شي او خپل ځان و ازمايي، خو له دې راستنیدو څخه یې موخه یوازې د پاکستان کورني کرکټ سیالیو کې لوبیدل دي.
عبدالرازاق ویلي په دې پوهیږي، چې نور د پاکستان لپاره په نړیوال کرکټ نشي لوبیدی، ځکه چې په زیات شمیر نوي ځوانان رامخکې شوي دي او هغوی په خپل ځای ښه لګیا دي.
پخواني الراونډر په خپلو خبرو کې ویلي مخکیني پاکستاني توپ وهونکي محمد وسیم دی د پاکستان په کورني کرکټ سیالیو کې د لوبیدو په موخه تشویق کړی دی.
رازاق ویلي، د کرکټ مینه یې لا هم ژوندۍ ده او یو ځل بیا یې هڅه کړې، چې د راتلونکو دوه کلونو لپاره نور هم په میدان کې ولوبیږي.
دغه پاکستان الراونډر وايي د پاکستان د کورني کرکټ قاید اعظم ټرافي تر څنګ د سږ کال رمضان جام سیالیو کې هم ګډون کوي او هم هیله لري، چې د پاکستان سوپر لیګ سیالیو د راتلونکي ۴ م پړاو سیالیو کې هم ګډون وکړي.
عبدالرزاق د پاکستان د کرکټ ملي لوبډلې په ګټه په ۴۶ ټیسټ، ۲۶۵ پنځوس اوریزه او ۳۲ شل اوریزه کرکټ سیالیو کې لوبیدلی او په لوبډله کې یې په خپل وخت کې د یو مهم لوبغاړي رول درلود.
نوموړی د پاکستان لپاره د جنوبي افریقا خلاف په ۲۰۱۳ م کال کې په وروستۍ ۲۰ اوریزه سیالۍ کې ولوبید او له هغې وروسته بیا په نړیوال کرکټ کې ونه لیدل شو.
دغه پاکستان کرکټر تیر کال د افغانستان د کورني کرکټ په شپږیزه لیګ سیالیو کې د لوبیدو په موخه د انګلستان څخه افغانستان ته هم راغلی و او د امو شارک لوبډلې سره ولوبید.