ليکنه: صابرحميدي
د افغانستان جمهوررئیس محمداشرف غني پرون شنبه له غرمې مخکې په چهارچڼار ماڼۍ کي د افغان فوټبال فدراسیون له مسئولینو او په افغان فوټبال غوره لیګ کي د پایلوبه کوونکو ټیمونو(طوفان هریرود او شاهین آسمايي) له لوبغاړو سره وکتل.
ولسمشر محمد اشرف غني لومړی طوفان هریرود فوټبال لوبډلي ته په افغان غوره لیګ اتم پړاو کي د اتلولۍ مبارکي وویله او وروسته ئې لوبغاړو ته په خطاب کي وویل، چي تاسي د هیلي نښه او د افغان ملت د عزم او ارادې تمثیلونکي یاست.
د هېواد جمهور رئیس دې ته په اشارې چي د ورزش پیاوړي کول د دولت دنده ده وویل، دولت د همدې لپاره د افغانستان د فوټبال غوره لیګ اتم پړاو تمویل کړ.
ولسمشر اشرف غني د یادي ناستي په پاي کي وویل، چي د دولت له بودیجي څخه به د طوفان هریرود او شاهین آسمايي فوټبال لوبډلي د ټولو لوبغاړو سره ۵۰ ـ ۵۰ زره افغانۍ نغدي مرسته وکړي.
د افغانستان د فوټبال غوره لیګ اتم پړاو یوه میاشت مخکي د ۸ لوبډلو ترمنځ پيل سوی وو، چي تېره جمعې ورځ ئې پایلوبه د طوفان هریرود او شاهین آسمايي ترمنځ ترسره سوه.
په یاده پایلوبه کي طوفان هریرود ۱ ګول پر ۰ شاهین آسمايي مات کړ او لومړی مقام ئې خپل کړ.
دا د طوفان هریرود درېیم ځل وو، چي د افغان غوره لیګ په اتو پړاونو کي ئې لومړی مقام خپل کړ.
د طوفان هریرود ترڅنګ ۴ ځلي شاهین آسمايي او ۱ ځلي بیا سپين غربازانو یاد جام خپل کړی.
د یادولو وړ ده، چي سږ کال لومړنی ځل وو، چي د «یو ولس او یو ږغ» تر شعار لاندي دا لیګ د جمهوري ریاست له لوري ملاتړ کېده.