په عامه او ستراتیژیکو چارو کې د ولسمشر محمد اشرف غني سلاکار وحید عمر وايي، هېڅ کس یا اداره حق نه لري چې د اساسي قانون پر خلاف د هېوادوالو لپاره محدودیتونه وټاکي.
ښاغلي عمر دغه څرګندونې د پوهنې وزارت د وروستۍ پرېکړې په غبرګون کې چې ویلي یې دي له ۱۲ کلنۍ د لوړ عمر لرونکې نجونې نه شي کولای د نارينه وو په غونډو کې ترانې ولولي.
نوموړي نن شنبه پر خپله ټویټرپاڼه لیکلي چې دوی د پوهنې وزارت له مشرتابه سره په اړيکه کې دي، ترڅو د یادې پرېکړې په هکله خپل دریځ روښانه کړي.
قانون اساسی کشور حقوق، وجایب و آزادی های فردی و جمعی اتباع کشور را تضمین کرده است. هیچ فرد یا نهادی اجازه ندارد تا بر خلاف روحیه قانون اساسی کشور برای شهروندان کشور حدود تعیین کند. با رهبری وزارت معارف در تماس استیم تا در این مورد موضعگیری خود را روشن کند.
— Waheed Omer (@Waheed_Omer) March 13, 2021
د تېرې چهارشنبې په ورځ د پوهنې وزارت د يوې اعلاميې په خپرولو سره وويل، تر دې وروسته هغه نجونې چې له ۱۲ کلونو ډېر عمر ولري، نه شي کولی د نارینه وو په حضور غونډو کې ترانې ووايي.
د وحید عمر تر دې څرګندونې مخکې د افغانستان د بشري حقونو خپلواک کمېسیون د پوهنې وزارت د یادې پرېکړې په غبرګون کې ویلي و چې هنري مهارتونو ته لاسرسي د ماشومانو حق دی او نباید ترې محروم شي.
د همدې موضوع په تړاو یاران ویبپاڼې د پوهنې وزارت له ویاندې نجیبه آرین سره مرکه وکړه.
نوموړې په خپله مرکه کې وویل چې دا د کابل د پوهنې ریاست کار و او د پوهنې وزارت سره یې دا موضوع شریکه کړې نه وه.
د یادونې ده چې دغې پریکړې په هیواد دننه او بهر د ګڼو خلکو غبرګونونه راوپارول او دا کار یې د نجونو د حقونو اخیستل یاد کړل.
خو نجیبه آرین ویلي چې د پوهنې وزارت دا پریکړه بیرته اخلي او لنډ وخت کې به د دغه موضوع سپیناوی ولس ته ورکړي.
