ولسي جرګې له زلمي خلیلزاد غوښتنه کړي ده چې ژر تر ژره په افغانستان کې د روانې جګړې د پای لپاره اقدام وکړي.
د ولسي جرګې رییس میر رحمان رحماني ویلي چې له خلیلزاد سره یې تلیفوني خبرې کړې دي او د سولې په تړاو یې له هغه سره بحث کړی دی.
نوموړی زیاتوي، افغانستان کې د روانو جګړو او تاوتریخوالي اوج د جدي اندېښنې وړ دی او له خلیلزاد سره یې په خبرو کې له هغه غوښتي چې ژر تر ژره دلته د جګړې د ختمولو لپاره اقدام وکړي.
د رحماني په خبره خلیلزاد ډاډ ورکړی چې افغان جګړه به د خبرو له لارې پای ته رسېږي او افغانستان به له دایمي ثبات برخمن شي.
هیره دې نه وي چې افغان چارواکي وايي چې د طالبانو شاوخوا ۶۰۰ خوشي شوي بندیان یې بېرته نیولي دي.
د افغان چارواکو په وینا، دا کسان چې د امریکا او طالبانو د موافقې پر اساس خوشي شوي وو، د جګړې په ترڅ کې بېرته نیول شوي دي.
د افغانستان د ملي امنیت سلاکار حمدالله محب د یکشنبې په ورځ وویل چې خوشي شوي طالب بندیان بېرته د جنګ جبهو ته تللي وو.
د امریکا او طالبانو د ۲۰۲۰ کال د فبرورۍ د ۲۹ نېټې د موافقې پر اساس د افغانستان حکومت څه باندې ۵ زره طالب بندیان خوشي کړل.
طالبانو هم د افغانستان د حکومت زر تنه بندیان پرېښودل.
ښاغلي محب وویل چې د بندیانو خلاصون له سولې او اوربند سره مرسته ونه کړه او له همدې کبله د افغانستان حکومت نه غواړي چې نور طالب بندیان خوشي کړي.
دا په داسې حال کې ده چې طالبان د سولې د پروسې د پرمختګ لپاره د خپلو زرګونو نورو بندیانو د خلاصون غوښتنه کوي.
محب وايي«موږ د طالبانو ۶۰۰ خوشي کړي بندیان بیا نیولي ځکه چې دوی له دې ژمنې سره سره چې بیا به د جګړې میدان ته نه ځي، په جګړه کې برخه اخیستې وه.»
د افغانستان د ملي امنیت سلاکار همداراز وویل چې استخباراتي معلومات ښيي چې د طالبانو نور خوشي شوي بندیان هم اوس د جګړې په جبهو کې دي او پر افغان امنیتي ځواکونو یا ملکیانو بریدونو ته دوام ورکوي.
طالبان بیا دا خبره ردوي چې ګنې د دوی خوشي شوي بندیان په جګړه کې برخه لري.
