د آسټرالیا او سویلي افریقا کرکیټ ملي لوبډلو ترمنځ د سویلي افریقا په کوربتوب د ۳ یو ورځنیو لوبو د لړۍ څخه ئې پرون شنبه لومړۍ لوبه ترسره سوه، چي سویلي افریقا ـ آسټرالیا ته د ۷۴ منډو په توبیر سخته ماته ورکړه.
په یاده لوبه کي لومړی سویلي افریقا توپوهنه وکړه. سویلي افریقا په ټاکلو ۵۰ آورونو کي د ۷ لوبغاړو په سوځېدو سره آسټرالیا ته د ۲۹۲ منډو هدف وټاکی.
د سویلي افریقا لپاره هینریچ کلسین ۱۲۳ ناسوځېدلي، ډیویډ مېلر ۶۴، کایل ویریني ۴۸، تمبي بووما ۲۶ او ډیکوک بیا ۱۵ منډي جوړي کړې.
د آسټرالیا لپاره پات کومینز ۳، میچل سټارک ۲ او هزلوډ بیا یوه ویکیټ واخیستله.
کله چي د آسټرالیا لوبډله د هدف پوره کولو لپاره میدان ته کښته سوه، نو د ټولو لوبغاړو په سوځېدو سره ئې د لوبي په ۴۵،۱ آورونو کي ۲۱۷ منډي جوړي کړې او په ۷۴ منډو ئې ماته وخوړه.
د آسټرالیا لپاره سټیون سمیت ۷۶، مارنوس ۴۱، ډیویډ وارنر ۲۵ او شارټ بیا ۱۸ منډي جوړي کړې.
د سویلي افریقا لپاره بیا درې ویکیټي لنګي نګیډي، دوې ـ دوې انریچ نورتي او تبریز شمسي، خو کیشاو مهاراج او پیلهوکوا یوه ـ یوه ویکیټ واخیستله.
ټاکل سوې سویلي افریقا او آسټرالیا دوهمه یو ورځنۍ لوبه د راتلونکي چهارشنبې په ورځ ترسره کړي.
دې دوو هیوادونو تر دې مخکي د درو شل آوریزه سیالیو لړۍ هم ترسره کړه، چي هغه آسټرالیا ۲ پر ۱ وګټله.