د متحده عربي اماراتو په کوربه توب د لمړي ځل لپاره د کرکټ په تاریخ کې په نوې بڼه ۱۰ اوریزه سیالۍ پیل شوې، چې پکې کیراله کینګز او پښتون لوبډلې بریاوې خپلې کړې.
په دې سیالیو کې چې د پښتون، پنجابي لیجینډز، مراتا اربینز، بنګال ټایګرز، کیراله کینګز او کولمبو لاینز لوبډلو ګډون کړی دی، په لمړیو دوه لوبو کې د کیراله کینګز لوبډله د بنګال ټایګرز او پښتون لوبډله د مراتا اربینز پر وړاندې په سیالیو کې مخامخ شوې، چې پکې دواړو بنګال ټایګرز او مراتا اربینز خپلو سیالانو ته ماتې وخوړې.
د بیګا شپې په سیالیو درې افغان لوبغاړي نجیب الله ځدران، مجیب ځدران او ظاهر خان د خپلو لوبډلو په ګټه سیالۍ ترسره کړي، چې د نجیب الله ځدران په شتون کې پښتون لوبډلې لمړي بریا، خو بنګال ټایګرز د مجیب ځدران او ظاهر په شتون کې بریا حاصله نکړه.
د نن ورځ او شپې په لوبو کې به ۴ سیالۍ ترسره شي، چې پکې بنګال ټایګرز د پنجابي لیجنډز، مراتا اربینز د کولمبو لاینز، پنجابي لیجننډز په دویمې سیالۍ کې د کیراله کینګز او پښتون لوبډله په دویمه لوبه کې د کولمبو لاینز سره د لوبې په ډګر کې مخامخ شي.
د ټي ټین یا د کرکټ دا ۱۰ اوریزه سیالۍ به د همدې ډیسمبر میاشتې تر ۱۷ مې نیټې پورې دوام وکړي.