د افغانستان د کورني کرکټ «APL» یا افغان پریمېیر لیګ سیالیو لپاره د لوبغاړو د ډرافټ یا خرڅلاو لړۍ نن په متحده عربي اماراتو کې ترسره کیږي، چې ورته د کرکټ افغان مینه وال انتظار دي.
د افغانستان د کرکټ بورډ لخوا د افغان غوره لیګ سیالیو لمړی سیزن په روان ۲۰۱۸ م کال کې پیلېدونکی دی، چې نن یکشنبه ورته د لوبډلو ملاتړ کوونکې ډلې د لوبغاړو د پیرلو موقع لري.
د کرکټ بورډ د معلوماتو له مخې، د لوبغاړو د خرڅلاو پروګرام، چې پکې لوبغاړي نیلامۍ ته وړاندې کیږي، نن ماښام شاوخوا ۳ بجې پیل کیږي.
د افغانستان کرکټ بورډ د رسنیو څانګې د معلوماتو له مخې د دغه لیګ سیالیو لپاره به د نن ماښآم د لوبغاړو خرڅلاو پروسه کې د افغان لوبغاړو ترڅنګ د کرکټ پیاوړي بهرني لوبغاړي هم نیلامۍ ته وړاندې شي.
ویل کیږي، دغه لیګ لپاره له ۴۰۰ څخه زیاتو کورنیو او بهرنیو لوبغاړو نوم لیکنه کړې ده، چې پکې د ویسټ انډیزي کریس ګیل، نیوزیلنیډي برینډن مکلم، پاکستانیو لوبغاړو شاهد افریدي، شعیب ملک، سریلنکايي کمارا سنګا کارا، ویسټ انډیزي انډیریو رسل، بنګله دیشي تمیم اقبال او د نورو مشهوره لوبغاړو نومونه هم ثبت شوي دي.
د افغانستان د کرکټ بورډ عمومي مشر عاطف مشعل دوه ورځې وړاندې په یو خبري کنفرانس کې په ډاګه کړه، چې هر لوبډله به تر ۵ نیم لکه امریکايي ډالرو په لوبغاړو پانګونه کوي.
د نوموړي د معلوماتو له مخې د ۹۰ افغان لوبغاړو له ډلې به ۵۲ یې د سیالیو لپاره وپیرل شي او په دغه نیلامۍ کې داسې کورني او بهرني لوبغاړي هم شامل دي، چې تر یو لک امریکايي ډالرو پورې یې قیمت ټاکل شوی دی.
د افغانستان د کورني کرکټ دغه ۲۰ اوریزه تجارتي سیالۍ د لمړي ځل لپاره په متحده عربي اماراتو کې د راتلونکې اکټوبر میاشتې له ۵ مې نیټې څخه پیل او د ۱۷ ورځو دوام وروسته به د همدغه میاشتې په ۲۱ مه نیټه پای ته ورسیږي.
