د افغانستان د کورني کرکټ «APL» یا افغان پریمېیر لیګ سیالیو لپاره د لوبغاړو د ډرافټ یا خرڅلاو لړۍ نن ترسره شوه، چې پکې لوبغاړي په ۶ کټه ګوریو کې ویشل شوي وو.
د لوبغاړو د خرڅلاو په لړۍ کې د «آيکن، ډایمنډ، ګولډ، سلور، اسوشېیټ او ایمرجینګ» کټه ګورۍ ځانګړې شوې وې، چې پکې د آیکن کټه ګورۍ لپاره یو لک امریکايي ډالر، ډایمنډ کټه ګورۍ کې د افغان لوبغاړو لپاره ۶۰ زره او بهرنیو لوبغاړو لپاره ۷۵ زره امریکايي ډالر، د ګولډ کټه ګورۍ کې د افغان لوبغاړو لپاره ۴۰ زره او بهرنیو لوبغاړو لپاره ۵۰ زره امریکايي ډالر، د سلور کټه ګورۍ کې د افغان لوبغاړو لپاره ۲۰ زره او بهرنیو لوبغاړو لپاره ۳۰ زره امریکايي ډالر، د اسوشېیټ کټه ګورۍ کې د ۱۵ زره امریکايي ډالر او د ایمرجینګ کټه ګورۍ کې د افغان لوبغاړو لپاره ۱۰ زره امریکايي ډالر قیمت ټاکل شوی و.
په لمړي قیمتي کټه ګورۍ کې بلخ لوبډلې ویسټ انډیز کریس ګیل، کندهار لوبډلې نیوزیلینډي برینډن مکلم، پکتیا لوبډلې پاکستانی الراونډر شاهد خان افریدي، ننګرهار لوبډلې ویسټ انډیزی انډریو رسل او کابل لوبډلې افغان راشد خان د یو لک امریکايي ډالرو په بدل کې خپل کړل.
که څه هم په دغه لیګ کې د مینه والو لپاره د لوبډلې ټاکنه اسانه خبره ده، خو د ګټونکې لوبډلې په اړه هیڅ نشي ویل کیدای، ځکه چې په هره لوبډله کې مشهوره بهترین لوبغاړي واخیستل شول.
بلخ لوبډله د کریس ګیل، محمد نبي، کولین مونرو، کامران اکمل، محمد عرفان، کابل لوبډله د راشد خان، کولین اینګرام، لوکي رانچي، سهیل تنویر، حضرت الله ځاځی، کندهار لوبډله د برینډن مکلم، اضغر افغان، سیم بیلینګز، پال سټیرلینګ، کریم صادق، ټایمل میلز، وهاب ریاض، پکتیا لوبډله د شاهد افریدی، محمد شهزاد، کیمرون ډیلپورټ، لوکي رایټ، سمیع الله شینواري، کریس جورډن او ننګرهار لوبډله د ویسټ انډیزي الراونډر انډري رسل، اسټرالوي بین کټینګ، تمیم اقبال، میچل میکلینګن، محمد حفیظ، شفیق الله شفق او مجیب ځدران په څیر لوبغاړي په خپل ترکیب کې لري.
د یادونې وړ ده، چې د افغانستان د کورني کرکټ افغان غوره لیګ په نوم د کرکټ ۲۰ اوریزه تجارتي سیالۍ د لمړي ځل لپاره په متحده عربي اماراتو کې ترسره کیږي، چې د راتلونکې اکټوبر میاشتې په پنځمه نېټه پیل کیږي.
په دغه لیګ کې به ټولې ۲۳ لوبې ترسره شي او د ۱۷ ورځو دوام وروسته به د همدغه میاشتې په ۲۱ مه نیټه پای ته ورسیږي.
