ټاکل شوې د افغانستان مذاکراتي پلاوی د دویم پړاو بینالافغاني مذاکراتو لپاره سبا دوحې ته لاړ شي.
د راپورونو له مخې، ټاکل شوې وه د افغان حکومت مذاکراتي پلاوی نن ماسپښین دوحې ته روان شي خو د نامعلومو دلایلو پر بنسټ دغه سفر د سبا سهار لپاره ځنډېدلی او ټاکل شوې یاد پلاوی سبا دوحې ته روان شي.
بلخوا د دویم پړاو پر مذاکراتو اندېښنې او پر پیلېدو یې شکونه موجود دي، د افغان حکومت ځینې چارواکي وایي، چې دغه مذاکرات به پر ټاکلي وخت پیل نه شي، خو د مذاکراتي پلاوي غړي بیا ډاډ ورکوي چې مذاکرات به په ټاکلي وخت په ټاکلي ځای کې پېلېږي.
د افغان حکومت د مذاکراتي پلاوي غړې فاطمې ګېلاني رسنیو ته وویل، ډاډه ده چې مذاکرات به پر ټاکلي وخت او ټاکلي ځای پیلېږي، د هغې په وینا کوم دلیل نشته چې له مخې یې دغه مذاکرات وځنډول شي او د دواړو لورو ترمنځ پر دغه نېټه توافق شوی چې باید پر همدې نېټه بېرته پیل شي.
په ورته وخت کې د افغانستان مذاکراتي پلاوي تېر ماښام له ولسمشرغني سره هم کتلي او د تېرو کړنو په اړه یې معلومات او د راتلونکو په اړه یې سلا مشورې او خپل پلانونه ورسره شریک کړل.
په دې کتنه کې ولسمشرغني مذاکراتي پلاوي ته وویل، دغه پلاوی د افغان حکومت بشپړ ملاتړ له ځانه سره لري، دوی باید په مذاکراتو کې د افغانستان د خلکو له حقوقو دفاع وکړي او په خبره یې مذاکرات باید د اساسي قانون پر بنسټ مخته ولاړ شي.
دغه راز ویل کېږي په دویم پړاو مذاکراتو کې به افغان پلاوی د اوربند غوښتنه وکړي خو د طالبانو مذاکراتي پلاوي لا تراوسه د دویم پړاو مذاکراتو باندې کومه تبصره نه ده کړې او له رسنیو سره یې د خپل سفر په اړه هیڅ هم نه دې ویلي.
خو ددې هر څه سره سره د امریکا د بهرنیو چارو وزیر بیا په تازه څرګندونو کې د سولې خبرې یو ښه پرمختګ بللی او پر خپل ټوېټر یې لیکلي چې په تېر یوه کال کې په افغانستان کې د دوی هېڅ سرتېری نه دی وژل شوی.
د پمپیو دې څرګندونو د افغانستان د ولسمشرۍ ماڼۍ او مشرانو جرګې غبرګونونه راپارولي دي.
د افغان ولس یواځینۍ غوښتنه له طالبانو په بین الافغاني مذاکراتو کې د اوربند د کولو ده خو طالبانو تر اوسه د اوربند خبره نه ده منلي.
دا چې دوهم پړاو خبرو کې څه کیږي او په کومو خبرو عمل کیږي راتلونکی به یې ځواب کړي.
