شهزاد محمدي د افغان لوبډلې پیلیز او برید کوونکی توپوهونکی دی، چې تل یې د افغان لوبډلې لپاره په اوپننګ کې مثبتې لوبې کړي دي او لا هم د ریکارډ پر کرښه ولاړ دی.
په شل اوریزو لوبو کې په یوه کال کې تر دې دمه یواځینی لوبغاړی شهزاد محمدي دی، چې زیاتې شپږیزې یې وهلي دي او تر اوسه یې دا ریکارډ چا نه دی مات کړی.
د کرېک ټرېکر وېب پاڼې یو انځور کې لیکلي، چې په ۲۰۱۶ کې په شل اوریزو لوبوکې د زیاتو شپږیزو وهونکي لوبغاړي.
شهزاد محمدي
په دې انځور کې د شهزاد محمدي د ۲۴ شپږیزو په وهلو سره لومړي سر کې دی، هغه په ۲۰۱۶ کال کې دا ریکارډ جوړ کړی او لا هم مخکښ دی.
دویم ځای د نیوزیلېنډ پیلیز او برید کوونکي توپوهونکي مارټېن ګوپټېل نیولی دی، ده ۲۳ شپږیزې وهلي او له شهزاد محمدي څخه یوه شپږیزه وروسته دی.
درېیم ځای د نیوزیلېنډ اوپنر او چټک توپوهونکي کولېن منرو خپل کړی دی، هغه په ۲۰۱۶ کې په شل اوریزو لوبو کې ۱۹ شپږیزې وهلي دي.
څلورم ځای د زِمبابوې اوپنر توپوهونکي همېلټن مسکډزا ترلاسه کړی دی، هغه په شل اوریزو لوبوکې په یوه کال کې ۱۸ شپږیزې وهلي دي.
او پنځم ځای د بنګله دېش کیڼ لاسي پیلیز توپوهونکي تمیم اقبال خپل کړی دی، ده ۱۷ شپږیزې وهلي دي.
یعنې دا د په اوپنرانو کې هغه توپوهونکي دي، چې په شل اوریزو لوبو کې یې په یوه کال کې زیاتې شپږیزې وهلي دي او شهزاد محمدي پکې د افغانستان بیرغ هسک کړی دی.
