د افغانستان کرکټ بورډ د لوبغاړو غوراوي کمېټې د کرکټ اسیايي شورا لخوا د پیلیدونکې ۵۰ اوریزه اسیا جام سیالیو کې د ګډون په موخه خپله لوبډله اعلان کړه.
د کرکټ بورډ د غوراوي کمېټې په اعلان کړي ۱۷ کسیز لیست کې اضغر افغان، محمد شهزاد، احسان الله جنت، جاوید احمدي، رحمت شاه زرمتی، سمیع الله شینواری، محمد نبي عیسی خیل، حشمت الله شاهدي، ګلبدین نایب، نجیب الله ځدران، راشد خان، منیر احمد، شراف الدین اشرف، افتاب عالم، سعید شیرزاد، مجیب ځدران او وفادار مومند شامل کړي دي.
په دغه اعلان شوې لوبډلې کې د لمړي ځل لپاره ویکټ کیپر توپ وهونکي منیر احمد ته د لمړي ځل لپاره په ملي لوبډله کې چانس ورکړل شوی دی، خو شراف الدین اشرف یو ځل بیا لوبډلې ته د دولت ځدران پر ځای راستون شوی دی.
د افغان کرکټ ملي لوبډلې تیز بالر دولت ځدران درې میاشتې وړاندې د بنګله دیش خلاف ۲۰ اوریزه سیالیو ته د تیاریو په موخه په تمریناتي کیمپ کې ټپي شوی و، چې په وروستیو کې د ایرلینډ د کرکټ ملي لوبډلې پر وړاندې د درې ۵۰ اوریزه سیالیو په نوملړ کې شامل شو، خو نوموړی لا هم ټپي دی او اسیا جام په سیالیو کې یې ګډون ناممکن شو.
د کرکټ اسیا جام سیالۍ د ورانې سیپټمبر میاشتې په ۱۵ مه نیټه په متحده عربي اماراتو کې پیل کیږي، چې ورته له افغانستان وړاندې، سریلنکا، بنګله دیش او هندوستان هم خپلې لوبډلې اعلان کړې دي، خو یواځې پاکستاني کرکټ بورډ تر دې مهاله د خپلې لوبډلې اعلان ځنډولی دی.
د دغه جام په سیالیو کې ګډون کوونکې لوبډلې په دوه ګروپونو ویشل شوې دي، چې په لمړي ګروپ کې پاکستان له هندوستان او د غوراوي څخه د راتیریدونکې لوبډلې سره، خو په دویم ګروپ کې افغانستان له سریلنکا او بنګله دیش سره یو ځای قرار لري.
افغان لوبډله د اسیا جام په سیالیو کې لمړی د سریلنکا او ورپسې د بنګله دیش د کرکټ ملي لوبډلې سره مخامخ ده، چې د سیالیو په ګټلو سره دویم پړاو ته لار پیدا کوي.
د سیپټمبر میاشتې په ۱۷ مه نیټه به افغانستان د سریلنکا او د لمړي پړاو په وروستۍ ورځ ۲۰ مه نیټه به د بنګله دیش د کرکټ ملي لوبډلې سره په سیالۍ کې بخت و ازمايي.
