ليکنه: مدثر دعوت
د باليووډ د باچا شاهرخ خان نوم اوس په هندوستان کي د هر فرد پر خوله جاري دی.
وروسته له هغې چي په هندوستان کي د کرونا ويروس مثبتي پيښي په ډيريدو سوې يو لړ سينمايي لوبغاړي او ورزشکاران د خپلو خلکو د لاسنيوي لپاره رامخته سوه.
د باليووډ څخه ريتيک روشن ۲۵ لکه،ويرن داون ۵۰ لکه، اجی ديوګن ۵۱ لکه، کارتيک ارين يو کروړ،پرباس ۴ کروړه، اکشي کمار ۲۵ کروړه او سلمان خان ۳۵ کروړه هندۍ کالداري مرسته اعلان کړه.
خو شاهرخ خان يوازي دا نه چي ۷۰ کروړه هندۍ کالداري مرسته يې وکړه بلکي په نورو اړخونو کي يې هم د خپل ولس او حکومت سره د لاسنيوي لپاره ور ودانګل.
شاهرخ خان ۲۵۰۰ هغه کارګرو ته چي اوس بيکاره دي او پخپلو کورونو کي قرنطين دي هره مياشت معاشونه ورکوي.
د ممبی د پوليسو سره يې په هره مياشت کي ۱۰۰۰۰ بستو خوراکي موادو مرسته اعلان کړه.
غريبو او اړو کورنيو ته ۵۵۰۰ بستې خوراکي توکي برابرول او ۲۰۰۰ بستې پاخه خواړه ويشل او ځيني نوري مرستي دي چي د کرونا ويروس د ځپل سويو کسانو او کورنيو لپاره يې اعلان کړيدي.
ددې ټولو مرستو سره سره شاهرخ خان او ګوري خان خپل ۴ پوړه په امکاناتو سمبال شخصي دفترونه د هند د حکومت په واک کي ورکړه تر څو د غريبانو او د کرونا ويروس د ناروغانو لپاره د قرنطين پر مهال ترې استفاده وکړي.
د ممبی اعلی وزير د شاهرخ خان څخه ځانګړې مننه کړې او هغه يې يو اتل ياد کړی.
پر ټولنيزو رسنيو عام خلک د شاهرخ خان د ميني او ولس سره د ملاتړ پخاطر متاثره ښکاري او هغه ته يې د روغتيا د باچا لقب ورکړی.
په هندوستان کي تر دې مهاله په کرونا ويروس ۳۰۸۲ کسان اخته دي چي له امله يې ۸۶ کسان مړه سويدي.