لیکنه : عبدالله عادل
سریلانکايي چټک توپ اچوونکي نووان پرادیپ تېره اونۍ د سریلانکا لپاره د نړیوال جام په یوه مهمه لوبه کي د افغانستان خلاف د لوبي غوره لوبغاړی ونومول سو ، په هغه لوبه کي پرادیپ د ۳۱ منډو په ورکولو سره د افغانستان پنځه لوبغاړي اوټ کړل .
د بنګلدېش خلاف تر لوبي مخکي تېره ورځ یکشنبه نووان د تمریناتو پر مهال خپله کوچنۍ ګوته خوږ کړې او د بنګلدېش خلاف یې سبا سه شنبه ترسره کېدونکي مهمه لوبه له لاسه ورکړه.
د سریلانکا لوبډلي منېجر اسانتا ډي میل دا ومنل چي هغه به د سریلانکا په سبانۍ لوبه کي د بنګلدېش خلاف ونه لوبیږي.
اسانتا: ” پرادیپ به د بنګلدېش خلاف راتلونکي لوبه کي د سریلانکا لوبډلي برخه ونه اوسي، هغه به یوې اونۍ استراحت ته اړتیا ولري تر څو بیرته روغ او لوبدلي ته راوګرځي“
همدا راز ددې لوبډلي د بل لوبغاړي تیریماني په اړه هم وېره وه چي د تمریناتو پر مهال یې په پښه کي ستونزه احساس کړې ، لیکن د بورډ لخوا د هغه موجودیت او یا نه موجودیت په اړه څه ندي ویل سوي.
د سریلانکا مخکنۍ لوبه چي د پاکستان خلاف ترسره کېدونکي وه د باران له امله په مساوي توګه پای ته ورسېده ، اوس به د سریلانکا لوبډله د مشرفي مرتضی د لوبډلي خلاف سبا ماپښين ۲ بجې لوبه ترسره کړي.
نووان پرادیپ د ملینګا ، لکمل او پریرا تر څنګ د سریلانکا یو له کلیدي توپ اچوونکو څخه دی چي ورباندي د ښې توپ اچووني حساب کیږي.