ليکنه: مدثر دعوت
د باليووډ باچا شاهرخ خان او پرينکا چوپړا د هندوستان په نمايندګۍ د روغتيا د نړيوال سازمان له لوري جوړيدونکي پروګرام کي برخه اخلي.
د روغتيا نړيوال سازمان غواړي د نړيوالو مرسته کوونکو سازمانونو سره په ګډه د کرونا ويروس لپاره د پيسو راټولولو لپاره داسي پروګرام جوړ کړي چي د نړۍ مشهوري څيرې پکښې ګډون ولري.
شاهرخ خان او پرينکا چوپړا چي ۹ کلونه وړاندي يې په ډان ۲ فلم کي کار سره کړی وو داځل د خير په کار کي سره ملګري دي او دې پروګرام کي به ګډون کوي تر څو په نړيواله کچه د کرونا ويروس د زيانمنو لپاره لا ډيري مرستي را ټولي کړي.
دې پروګرام چي نوم يې ” يوه نړۍ،يوځای په کور کي ” دی ،نور مشهور فلمي اداکاران هم راځي چي د جان ليجنډ، الټن جان، ليډي ګاګا او ادريس البا نومونه د يادوني وړ دي.
د روغتيا نړيوال سازمان له لوري دا جوړيدونکی پروګرام به د رواني اپريل مياشتي په ۱۸مه نيټه ترسره سي.
شاهرخ خان يوازي دا نه چي ۷۰ کروړه هندۍ کالداري مرسته يې وکړه بلکي په نورو اړخونو کي يې هم د خپل ولس او حکومت سره د لاسنيوي لپاره ور ودانګل.
شاهرخ خان ۲۵۰۰ هغه کارګرو ته چي اوس بيکاره دي او پخپلو کورونو کي قرنطين دي هره مياشت معاشونه ورکوي.
د ممبی د پوليسو سره يې په هره مياشت کي ۱۰۰۰۰ بستو خوراکي موادو مرسته اعلان کړه.
غريبو او اړو کورنيو ته ۵۵۰۰ بستې خوراکي توکي برابرول او ۲۰۰۰ بستې پاخه خواړه ويشل او ځيني نوري مرستي دي چي د کرونا ويروس د ځپل سويو کسانو او کورنيو لپاره يې اعلان کړيدي.
ددې ټولو مرستو سره سره شاهرخ خان او ګوري خان خپل ۴ پوړه په امکاناتو سمبال شخصي دفترونه د هند د حکومت په واک کي ورکړه تر څو د غريبانو او د کرونا ويروس د ناروغانو لپاره د قرنطين پر مهال ترې استفاده وکړي.
پر ټولنيزو رسنيو عام خلک د شاهرخ خان د ميني او ولس سره د ملاتړ پخاطر متاثره ښکاري او هغه ته يې د روغتيا د باچا لقب ورکړی.