ليکوال: مدثر دعوت
بند امير نن بست ته د ۷۶ منډو په توپير ماته ورکړه.
د بند امير ښامارانو او د بست ساتونکو تر منځ خورا مهمه لوبه ترسره سوه چې په بایللو سره يې بست د شپږيزي لېګ څخه ووتی.
دا دويم پړاو کواليفاير لوبه وه او بند امير ددې لوبې ګټلو پخاطر سبا ماسپښين يوه بجه د ميس عينک سره نيمه پايلوبه کوي.
راځئ پدې وږغېږو چې ولې نن بست دا مهمه لوبه بايلوله او کوم لاملونه وه چې بند امير بريا ترلاسه کړه.
۱_ د ټاس اړوند پرېکړه
نن ګلبدين نائب د لوبې پچه وګټله او اصغر افغان ته يې د توپوهنې بلنه ورکړه.
په عموم کې د هر ليګ وروستۍ لوبې خورا فريشر لري نو ځکه هره لوبډله تر ډېره کوښښ کوي چې د ټاس په ګټلو سره توپوهنه وکړي او مقابل لورې ته يو چلنجي هدف وټاکي.
خو ګلبدين نائب او نوروز منګل ته نن د توپ اچوونې پرېکړه د قناعت وړ وه، پداسې حال کې چې اصغر افغان د ټاس د ترسره کولو وروسته وويله چې کچېرې موږ ټاس ګټلی وای نو توپوهنه مو انتخابوله چې د بند امير روزونکی رئيس احمدزی هم د ګلبدين نائب د پرېکړې خوښ برېښېدی.
۲_ د عثمان غني او حضرت ځاځي ښه پيل
عثمان غني او حضرت ځاځي د بست د بريدګرې توپ اچوونې په وړاندې تر پاورپلې وروسته هم د غلط شاټ هڅه ونکړه او ريسک يې وانخيستی.
دواړو اوپنرانو لوبه روانه ساتلې وه او په هر اوور کې يې د اړتيا وړ منډي کولې، د دوی دواړو ملګرتيا د نهم اوور په لومړي توپ د عثمان غني په ويکټې سره ماته سوه،پداسې حال کې چې دا وخت بند امير ۷۴ منډي درلودې او عثمان غني ۴۲ منډي کړي وې.
۳_ د اصغر افغان او ابراهيم ځدران ملګرتيا
په دوولسم اوور کې حضرت ځاځی هم د وقار الله له لورې په ۴۹ منډو وسوځېدی چې دا مهال د بند امير منډې ۱۱۴ وې.
وروسته د اصغر سره د ملګرتيا لپاره ابراهيم ځدران لوبغالي ته راکښته سو، او د لوبې رنګ يې بدل کړ.
د اصغر او ابراهيم ملګرتيا د لومړۍ پاړۍ تر وروستيو شېبو وه .
په وروستيو ۴ اوورونو کې چې د ګلبدين نائب،کريم جنت او سيد شېرزاد له لورې ترسره سوه اصغر او ابراهيم ورباندې ۸۵ منډي ترلاسه کړې چې هدف يې ۲۳۳ منډو ته ورسوی.
۴_ د اصغر افغان بريدګره توپوهنه
د روان پړاو شپږيزې لېګ په هغه لوبه کې چې کله بست او بند امير لومړي ځل لپاره سره مخامخ سوه، اصغر په ۲۷ توپونو ۵۵ منډي وکړې، ۶ څلوريزي او ۳ شپږيزي يې ووهلې.
خو نن یې تر هغې لوبې لا په جوش او ولولو توپوهنه ترسره کړه او دبست ټول توپ اچوونکي يې سرګردانه کړه.
د وروستيو اوورونو تر ټولو ډېرې منډې اصغر افغان وکړې او عثمان غني ورسره ملګرتيا ساتله.
نوموړي نن ۷ شپږيزي او ۶ څلوريزې ووهلې چې په ۳۹ توپونو يې ۹۵ ناسوځېدلي منډي وکړې.
نن اصغر فوق العاده کريکټ نندارې ته وړاندې کړ.
۵_ د بند امير توپ اچوونه
بست د ۲۳۳ منډو هدف په تعقيب داسې پيل وکړ چې ګواکي په زغم او باور سره د لوبې د ګټلو تکل لري.
د عمران جنت تر رن اوټ وروسته کريم جنت لاهم پدې تکل وو چې هدف ته به ځان رسوي خو وقار سلامخېل د بست دا هيله هم ور مړاوې کړه او په ۶۰ منډو کې عمران جنت وسوځېدی چې دا مهال بست ۹۷ منډې درلودې او ۲ لوبغاړي يې سوځېدلي وه.
د شفيق الله غفاري،منيراحمد کاکړ،احسان الله جنت او ګلبدين نائب تر ويکټو وروسته بست ۱۰۷ منډې درلودې،ياني بست د لسو منډو په منځ کې ۴ لوبغاړې له لاسه ورکړي وه.
وقار سلامخېل او ميرويس اشرف هغه توپ اچوونکي وه چې د بست د توپوهونکو ملا يې ورماته کړه او ټوله لوبه يې خپل په لاس کې واخيستله.
نن ميرويس اشرف په ۴ اوورونو کې ۱۴ منډي ورکړې او څلور لوبغاړي يې وسوځوله، همدارنګه وقار سلامخېل په څلورو اوورونو کې ۲۵ منډي ورکړې او ۴ ويکټي يې ترلاسه کړې.
نن د توپوهنې او توپ اچوونې په برخه کې د بند امير ښامارانو غوره کريکټ ترسره کړ او د راروانو لوبو لپاره يې لوبډلو ته د خطر زنګ ووهی.