د افغانستان د کرکټ ملي لوبډلې ځوان لوبغاړي راشد خان لخوا د هندوستان د کورني کرکټ «آي پي ایل» ۲۰ اوریزه سیالیو پر مهال د ۵ لکه هندي کالدارو نغدي جایزه په ننګرهار کې د غریبو او بې وزلو کورنیو ته ډالۍ شوه.
د راشد خان لخوا دغه نغدي مالي مرسته په ننګرهار کې د بهسودو کرکټ لوبغالي کې د بمي چاودنو له کبله د زیانمنو شویو خلکو او نورو بې وزلو کورنیو د لاس نیوي په موخه د کریم صادق خیریه بنسټ ته ورکول شوې وه، چې اوس په خلکو وویشل شوه.
د دغه خیریه بنسټ مشر او د افغانستان د کرکټ ملي لوبډلې لوبغاړي کریم صادق یاران ته په خپلو خبرو کې وویل، د ملي لوبډلې ځوان لوبغاړي راشد خان ورته د ۵ لکه هندي کالدارو مرسته، چې د ۷۵۰۰ امریکايي ډالرو معادل شوې، رالیږل شوې وه، چې نن یې په یو شمیر کورنیو وویشله.
کریم صادق وویل، ۱۰۰ هغه بې وزله کورنۍ، چې د غربت سختې شپې او ورځې تیرولې، ورسره د خوراکي توکو یو سیټ مرسته وشوه، چې پکې یوه بورۍ وړه، غوړي، لوبیا، دال، وریجي، بوره، شین چای او نور مواد شامل و؛ دغه کورنیو ته ورکړل.
همدا راز د نوموړي د معلوماتو له مخې، د بهسودو کرکټ لوبغالي د رمضان میاشتې په دویم ماښام د بمي چاودنو له کبله د زیانمنو شویو خلکو سره نغدي مرسته وکړه، چې د شهیدانو کورنیو ته یې ۱۰۰۰۰ لس زره افغانۍ او د ټپیانو شویو کسانو سره یې د ۵۰۰۰ پنځه زره افغانیو نغدي مرسته وکړه.
دا لمړی ځل نه دی، چې په ننګرهار کې د کریم صادق خیریه بنسټ لخوا د یو شمیرو کورنیو سره د خلکو په مالي لګښت مرسته کیږي؛ بلکې له دې وړاندې یې هم د څو نورو کورنیو لاس نیوی کړی دی.
باید وویل شي چې دغه خیریه بنسټ څه موده وړاندې په ننګرهار کې د یو لا علاجه ناروغ په درملنه نږدې ۶ لکه افغانۍ مصرف کړې او هم یې یوې بلې کورنۍ ته د کوز کنړ په ښیوې ولسوالۍ کې یوه جونګړه په پخې ودانۍ بدله کړه.
د خیریه بنسټ مشر کریم خان صادق په نورو سوداګرو هم غږ وکړ، چې د خیریه بنسټ سره یې مالي مرسته وکړي، تر څو د بې وزله خلکو په درد دوا شي.
