لیکنه: محمدصابر حمیدي
د اروپا د اتلانو فوټبال لیګ (چمپېنزلیګ) د دویم پړاو په سیالیو کې د نړۍ د نامتو لوبغاړو کریسټیانو رونالډو او لیونل میسي لوبډلو د سیالیو لوبډلو څخه ماته وخوړه او ویې نشو کړای بل پړاو ته لاره پیداکړي.
یوونټوس لوبډله
د کریسټیانو رونالډو په شتون کې یوونټوس لوبډلې د تګ او راتګ پړاو په سیالیو کې د پورتو لوبډلې څخه درې ګولونه پر دوه ماته وخوړه او له سیالیو ووته.
په دې سره پورتو لوبډلې د چمپېنزلیګ سیالیو درېیم پړاو یا کواټر پاینل سیالیو ته لاره وموندله.
بارسلونا لوبډله
بارسلونا لوبډلې د لیونل میسي په شتون کې د راتګ پړاو لوبه څو ورځې وړاندې د پي ایس جي لوبډلې سره ترسره کړې وه، چې څلور ګولونه پر یو یې د پي ایس جې لوبډلې څخه ماته خوړلې وه.
پرون شپه بارسلونا یوځلې بیا د تګ په پړاو لوبه کې د پي ایس جي لوبډلې سره ولوبېده، چې لوبه یو ـ یو مساوي شوه او په مجموعي پي ایس جي پنځه ګولونه پر دوه بارسلونا ته ماته ورکړه او بل پړاو ته یې لاره پيداکړه.
بارسلونا د یوونټوس ترڅنګ ونه توانېده، چې کواټر پاینل سیالیو ته لاره پیداکړي.
د اروپا د اتلانو فوټبال لیګ لومړی د ۳۲ لوبډلو ترمنځ په ګروپي توګه، بیا د ۱۶ لوبډلو ترمنځ د تګ او راتګ په ډول، بیا د ۸ لوبډلو ترمنځ د تګ او راتګ په ډول، بیا د څلورو لوبډلو ترمنځ د تګ او راتګ په ډول او له هغه وروسته پایلوبه دوې لوبډلې ترسره کوي.
