راپور: بشر درویش
ولسمشر اشرف غني یوه تازه مرکه کې غربي مشران د ۴۰۰ خطرناکو بندیانو په خوشې کولو تورن کړل.
د سپوتنیک خبري اژانس د راپور له مخې ولسمشر اشرف غني د ټایمز بریتانوۍ ورځپاڼې سره یوه مرکه کې ویلي چې اروپايي او امریکايي مشران د ۴۰۰ طالب بندیانو په خوشې کولو کې مسوولیت لري.
هغه دې ورځپاڼې ته ویلي:
«که په انګلستان او اروپا کې مخدره توکي ډیر شي او امفیتامین د متحده ایالاتو څنډو ته ورسیږي، نو ستاسو ټول مشران پکې دخیل دي. موږ باید د دې خلاصون په پایلو پوه شو ، او که دا خلک جرمونه وکړي، نو دا د نړۍ ګډ مسؤلیت دی.»
ویل کیږي چې د مخدره توکو یو شمیر لوی قاچاقبران او بهرني اتباع د طالبانو د پاتې بندیانو په ډله کې دي.
ویل شوي چې له ۱۵۰ ډیر د مخدره توکو قاچاقبران د طالبانو د بندیانو په لیست کې دي.
افغان حکومت دا بندیان خطرناک وبلل او د دوی برخلیک مشورتي لویې جرګې ته پریښود چې مشورتي لویې جرګې یې هم د خوشې کیدو تائید رایه ورکړه.
حکومت د لویې جرګې په پریکړې سره تر دې دمه ۸۰ کسان خوشې کړي دي.
ویل کیږي چې د طالب بندیانو خوشې کیدل د یو شمیر هیوادونو د مخالفت له امله ځنډیدلي دي.
فرانسې او آسټرلیا پدې وروستیو کې پر افغان حکومت غږ کړی چې د “ترهګرو” بندیان دې خوشې نه کړي.
تمه کیده چې د بین الافغانستان خبرې به د دې اونۍ په پیل کې د طالبانو د پاتې بندیانو خوشې کیدو وروسته پیل شي؛ خو ویل کیږي چې خبرې د خوشې کیدو په پروسه کې د ځنډ له امله ځنډول شوې دي.
بل پلو ته په ورته وخت کې، امریکايي چارواکي د امکان تر حده ژر تر ژره د بین الافغاني خبرو د پیل غوښتنه کوي او غواړي د طالب بندیانو خوشې کول ګړندي کړي.
تازه زلمي خلیلزاد هم په خپل خپل وروستي پيغام کې ویلي چې بین الافغاني خبرې دې ژر پیل شي.
