لیکنه: محمدصابر حمیدي
د هندوستان د کرکټ ملې لوبډلې تکړه او نامتو لوبغاړي مهندرا سینګ ډوهني د هندوستان کورنیو تجارتي سیالیو «IPL» ته چمتوالی پيل کړی.
هغه د تېر ۲۰۱۹م نړیوال جام څخه راورسته د ملې لوبډلې څخه لرې شوی او تراوسه ورسره بیا ندی یو ځای شوی.
ډوهني د هند آی پي ایل سیالیو ته په مارچ میاشت کې هم تمرینونه پیل کړي وه، خو د یاد ټورنمنټ تر ځنډېدو وروسته هغه خپل تمرینونه پريښودل او کور کې کرنتین شو.
خو د آی پي ایل سیالیو د نوې نیټې د اعلانیدو سره سم هغه یو ځلې بیا په تمرینونو پیل کړی.
ډوهني به سږ کال یو ځلې بیا چینای سوپر کینګز لوبډله رهبري کړي.
د انډین ایکسپریس د راپور له مخې چینای سوپر کینګز لوبډله د هند په آی پي ایل سیالیو کې د ګډون لپاره د روانې میاشتې په وروستیو کې متحده عربي اماراتو ته سفر کوي.
د هندوستان دا کورنۍ تجارتي سیالۍ د سیپټمبر میاشتې په ۱۹مه نېټه متحده عربي اماراتو کې پيلیږي او د نوومبر میاشتې تر ۱۰مې نېټې پوري دوام کوي.
دا ددې لیګ ۱۳م پړاو دی، چې درې افغان لوبغاړي محمدنبي، راشدخان ارمان او مجیب ځدران به هم پکې ولوبیږي.
