د افغانستان د کرکټ بورډ له لوري د شپږو زونونو ترمنځ د نهو ورځو راپدیخوا د ۱۹ کلنو کم عمره ځوانانو پنځوس اوریزې سیالۍ پیل شوې وې، چی اتلولي یې پرون د بند امیر زون لوبډلې وګټله.
په پایلوبه کې بند امیر او امو زونونو لوبډلې مخامخ شوې، امو د ټولو ۱۰ لوبغاړو په سوځیدو سره په ۴۸ اورونو کې د ۲۰۶ منډو هدف وټاکه، چې په ځواب کې بند امیر لوبډلې په ۴۹ م اور کې د ۷ لوبغاړو په سوځیدو سره یاد هدف پوره کړ.
فرمان زاخیل د امو زون لوبډلې ته ۸۰ منډې او بند امیر زون لوبډلې په ګټه اکمل خان ۵ ویکټې واخیستې او اصف موسی زي ۵۶ منډې جوړې کړې.
د پرونۍ پایلوبې غوره لوبغاړي جایزه د بند امیر زون تیز توپ اچونکي اکمل خان ته ورکړل شوه.
د افغانستان کرکټ بورډ په خپله رسمي فیسبوک پاڼه لیکلي؛ د بورډ اجراییه رییس شفیق الله ستانکزي د کرکټ بورډ له اړوندو څانګو مننه وکړه چی یادې سیالې یی په ښه شکل ترسره کړې او له لوبغاړو یی مننه وکړه چی په پوره او ښه ډیسپلین سره یی لوبې وکړې.
باید وویل شي چې نن په کابل او خوست کې د افغانستان کرکټ بورډ له لوري د غازي امان الله خان لیست A پنځوس اوریزې سیالۍ پیل شوي چې نن څلور لوبډلې یعنې دوه یې په خوست او دوه په کابل کې د یو بل مقابله کوي.