د اسټرالیا د کرکټ ملي لوبډلې د مسلسل ماتو وروسته د کرکټ په تاریخ کې پخوانی ۳۴ کلن ریکارډ بیا را تازه کړ.
له انګلستان په لوبه کې پرې دا ریکارډ تازه شو، انګلستان پرې په پنځوس اوریزه لوبه کې ۴۸۱ منډې وکړې، چې په نړیواله کچه یو ریکارډ ثبت شو.
د اسټرالیا د کرکټ ملي لوبډله په وروستیو کې د یو شمیر ستونزو سره مخ ده، چې پکې د لوبډلې په کار کردګۍ هم بد تاثیر شوی دی.
اسټرالیاوۍ لوبډلې په وروستیو کې لمړی خپل دوه لوبغاړي لوبډلمشر سټیو سمیت او مرستیال لوبډلمشر ډیویډ وارنر د جنوبي افریقا خلاف ټیسټ سیالۍ کې د بال سولونې د درغلۍ له کبله د لاسه ورکړل او ورپسې یې لوبډله د مسلسل ماتو سره مخ شوې ده.
د کرکټ نړیوالې شورا لخوا د ۵۰ اوریزه سیالیو وروستۍ درجه بندي اعلان شوه، چې پکې اسټرالوۍ لوبډله د پاکستان وروسته شپږم مقام ته ګوزار شوې ده.
د کرکټ نړیوالې شورا لخوا په نوې اعلان شوې درجه بندۍ کې کې انګلستان لمړی، هندوستان دویم، جنوبي افریق دریم، نیوزیلینډ څلورم، پاکستان پنځم، اسټرالیا شپږم، بنګله دیش اووم، سریلانکا اتم، ویسټ انډیز نهم او افغانستان لسم مقام خپل کړی دی.
اسټرالیاوۍ لوبډلې په وروستیو ۱۴ لوبو کې کې ۱۲ بایللې دي، چې ورته اوس په نړیواله درجه بندۍ کې سخته تمامه شوه او د شپږم مقام په خپلولو سره یې پخوانی ۳۴ کلن ریکارد را تازه کړ.
اسټرلیاوۍ کرکټ ملي لوبډله په کرکټ کې یو د راج کوونکو لوبډلو څخه شمیرل کیږي، خو په وروستیو کې د ریکي پونټینګ، مایکل کلارک، شین واټسن، شان ټایټ په څیر لوبغاړو د تقاعد کیدو او نورو پیاړو لوبغاړو په نشتون کې د ستونزو سره مخ ده.
