د بشري حقونو د څار سازمان وايي، پاکستاني پولیسو د افغان کډوالو پر کورونو چاپې وهلې او په خپل سر يې نیولي دي.
د دې سازمان په ټکو، پاکستاني پولیس له افغان کډوالو د استوګنې اسناد ضبط کوي او حتي په ځینو مواردو کې يې له هغوي رشوت اخیستی دی.
د بشري حقونو د څار سازمان نن په خپل راپور کې ویلي، پاکستاني چارواکو د افغان کډوالو پر ضد فشارونه زیات کړي څو افغانستان ته ستانه شي.
د دې سازمان په ټکو، هغه افغانستان ته چې هلته د طالبانو د حکومت له لوري له محدودیتونه، ځورونې او اقتصادي ستونزې د پخوا پرتله څو برابره شوي دي.
په راپور کې د دې سازمان د اسیايي څانګې مشرې ایلین پیرسون په حواله راغلي،
“پاکستاني چارواکي باید ژر تر ژره د افغان کډوالو له جبري ایستلو لاس واخلي، طالبان هم باید له ستنو شوو افغانانو سره د ناوړه چلند څخه ډډه وکړي او د ښځو او نجونو پر وړاندې خپلې سخت دریځې پالیسۍ لغوه کړي.”
راپور زیاتوي چې ډېر افغانان د دې لپاره بېرته افغانستان ته تللي چې د پاکستاني پولیسو له نیولو او ځورونې وډار شول.
پاکستاني چارواکو وړاندې ادعا کړې وه چې یوازې هغه افغانان نیسي چې قانوني اسناد نه لري، خو ګڼ شمېر افغان کډوال چې د قانوني اسنادو درلودونکي دي وايي، پولیسو هغوی هم نیولي، زورولي او ورته سپکاوی شوی دی.
په پاکستان د میشتو افغان کډوالو اندېښنې
په اسلام اباد کې د زرمینې په نوم یوه افغانه کډواله وايي،
“کله چې پولیس د کورونو د تلاشۍ لپاره راځي، له موږ سره ډیر بد چلند کوي، ښځې وهي او سپکاوی ورته کوي، کله کله خو ځیني پولیس د عقدې له مخې له موږ سره ډیر سخت چلند کوي، زموږ حالت دلته ډیر خراب دی”.
په پيښور کې بل میشت افغان کډوال ضیاالدین بیا وايي، “پولیس قانوني اسناد لرونکي افغان کډوال نیسي او بیرته يې د پیسو په بدل کې خوشي کوي، زه دلته د اوسیدو قانوني ویزه لرم خو دوی ونیولم او بیرته يې د پیسو په بدل کې راخوشې کړم”.
د پاکستان حکومت د مارچ ۳۱مه، د هغو افغان کډوالو د وتلو وروستۍ نېټه ټاکلې، چې “ای سي سي” کارتونه لري خو کډوال وايي چې په دومره کم وخت کې ستنېدل ورته ناممکن دي.
په خیبر پښتونخوا کې د افغان کډوالو د متحده عالي شورا مشر بریالي میاخیل دوه ورځې مخکې په یوې خبري غونډه کې ویلي و، د پاکستان د حکومت دا پرېکړه غیرعملي ده او غوښتنه یې وکړه چې باید بېرته واخیستل شي.
نوموړي وړاندیز وکړ چې پاکستان، افغانستان او د ملګرو ملتونو د کډوالو عالي کمېشنري باید په ګډه د کډوالو د استازو په مشوره، یوه حللاره ومومي.
خو د پاکستان حکومت لا د مخه د طالبانو د حکومت هغه غوښتنه رد کړې چې د افغان کډوالو د ایستلو نېټه دې وغځول شي.
د پاکستاني رسنیو د راپورونو له مخې دا غوښتنه له دیپلوماتیکو لارو شوې وه خو پاکستان پرې مثبت غبرګون نه دی ښودلی.
