د امریکا د بهرنیو چارو وزیر مارکو روبیو په افغانستان کې د ترهګرو ډلو د فعالیتونو د زیاتوالي په اړه اندیښنه څرګنده کړې.
هغه پر افغانستان د طالبانو بشپړ کنټرول تر پوښتنې لاندې راوستی دی.
ښاغلي روبیو دا څرګندونې په هغې مرکه کړې چې د پنجشنبې په ورځ د (فبرورۍ په ۲۰مه) خپره شوې ده.
د روبیو په ټکو، “کله چې یو حکومت د بشپړ کنټرول توان ونلري نو د ترهګرو ډلو لپاره د نفوذ او فعالیت زمینه برابروي.”
هغه زیاته کړه چې د اوسني وضعیت او لس کاله وړاندې حالت ترمنځ عمده توپیر دا دی، چې امریکایي ځواکونه نور د ترهګرو ډلو د تعقیب او په نښه کولو لپاره په افغانستان کې حضور نه لري.
د روبیو په ټکو، طالبانو په ځینو مواردو کې د القاعدې او داعش پر وړاندې له امریکا سره همکاري کړې، خو په یو شمېر مواردو کې یې کافي همکاري نه ده کړې.
تر اوسه د طالبانو حکومت د امریکا د بهرنیو چارو وزیر د دې څرګندونو په اړه رسمي غبرګون نه دی ښودلی، خو پخوا یې تل ټینګار کړی چې داعش په افغانستان کې ځپل شوی دی.
له هغه مهاله چې طالبانو د افغانستان کنټرول ترلاسه کړی، د داعش خراسان څانګې د دغه هېواد په بېلابېلو سیمو کې د خونړیو بریدونو او چاودنو مسؤلیت منلی دی.
همداراز، د ملګرو ملتونو امنیت شورا د فبرورۍ په میاشت کې په افغانستان کې د القاعدې، داعش او جماعت انصارالله په څېر ترهګرو ډلو د حضور او فعالیتونو په اړه ژوره اندیښنه څرګنده کړې ده.
