خبريال: مدثر دعوت
د باليووډ سېنما مشهور فلمي ستوري سوشانت سينګ راجپوټ مړی نن په خپل کور کې پيدا سوی.
د هند پوليس د سوشانت مړينه تائيدوي او ادعا کېږې چې سوشانت سينګ به ځانوژنه کړې وي.
د ۳۴ کلن سوشانت مړی د ممبی په بندرا کې د هغه خپل کور په شپږم پوړ کې پيدا سویدی.
پداسې حال کې چې پوليس دده مړينه ځانوژنه بولي خو د ممبی د پوليسو وياند پرانای اشوک رسنيو ته ويلي چې دده په کور کې هيڅ ډول ياداشت او د ځانوژنې دليل او ثبوت ندی موندل سوی،خو دده په خبره پوليس په څېړنو بوخت دي.
د سوشانت ټېم په يو پيغام د خلکو څخه غوښتنه کړې چې هغه په خپلو فکرونو کې وساتي،د هغه ژوند او کار ولمانځئ،خو دا شېبه دهغه په محروميت ساتلو کې زموږ سره مرسته وکړئ.
څلور ورځې وړاندې د سوشانت ۲۸ کلنې مديري ديشا ساليان په خپل کورکې ځانوژنه کړې وه،په اړه يې سوشانت ټويټ هم کړی وو او ددې مرګ سخت نا ارامه کړی وو،خلک او رسنۍ دده مړينه د هغې د مرګ سره تړي.
سوشانت په باليووډ کې خپل سفر په ۲۰۱۴ز کې د پي کې فلم څخه وکړ، ورپسې يې کدرينات، شوده ديسي رومانس او د هندي کريکټر مهندراسينګ ډهوني پر ژوند او مسلک فلمونه جوړ کړل.
د نوموړې ټول فلمونه ستايل سوي ، د ام اس ډهوني فلم يې د کال غوره فلمونو څخه وو او د کال تر ټولو بريالۍ کيسه وه.
سوشانت پدې وروستيو کې د باليووډ د ځوان نسل يو له برياليو لوبغاړو څخه وو چې په ډېر کم وخت کې يې د ډېرو مينوالو زړونه خپل کړي وه.
د هند لومړي وزير د باليووډ او د هندوستان د کريکټ د نړۍ ټولو لوبغاړي د نوموړي په مرګ سخته خواشيني څرګنده کړې او دده مرګ يې يوه لويه ضايع بللې ده.
په روان کال کې د باليووډ سينما دوه نور مشهور ستوري عرفان خان او ريشي کپور هم مړه سويدي چې دا د باليووډ په تاريخ کې تر ټولو غمجن او تور کال ياديږي.
دا پداسې حال کې ده چې د روغتيا د نړيوال سازمان د راپور له مخې د هند ۶.۵% نفوس له جدي رواني ناروغيو سره مخ دی.