زموږ خاورینه کُره ( مځکه) له ډیرو حیرانونکو شیانو ډکه ده. څښتن تعالی د مځکې طبیعت له داسې عجایبو جوړ کړی چې له ګڼو اسرارو او د خلقت له رازونو ډک دی.
د مځکې سره له بې شمیر داسې عجایبو ډک دی چې معاصر ساینس او بشري علم یې له پوهیدو عاجز دی.
دلته له بې شمیره داسې عجوبو ۷ درسره شریکوو.
هندوستان، جاذبه لرونکې غونډۍ
دا په هندوستان کې داسې غونډۍ دي، که تاسو یې په بیخ کې موټر ودروئ او نیوټرل یې کړئ، نو موټر خپله مخ پورته په غونډۍ روانیږي. په سیمه کې په دې اړه ویل کیږي چې په غونډۍ کې یو ناڅرګند ځواک دی چې موټر ځان ته راکاږي خو ددې پدیدې لپاره کومه ساینسې او قطعې توضیع تر اوسه نه ده موندل شوې، البته ځینې فکر کوي چې د جاذبه لرونکو غونډویو له خوا د اوسپنې راښکون ښايي ددې سبب وي.
پر یو بل اېښودل شوې زیارت ډوله تیږې
د یو ځانګړې ترتیب له مخې د سترو کاڼو دا ډول ګونبدې په افریقا، چین، روسیه، کوریا، امریکا او اروپا کې موندل کیږي. دې مقبرو ته ورته لرغونو جوړښتنونه ته لرغون پوهان دولمین (Dolmen ) وايي چې د دوی په باور ښايي د لرغونو زمانو د کشیشانو قبرونه وي. دا ډول له درنو کاڼو جوړ شوي جوړښتونه د نړۍ په بیلابیلو برخو کې په مختلفو جوړښتونو پاتې دي. ویل کیږي ځینې دولمینونو ته نژدې ساعتونه وخت بدلوي او نور بريښنايي او ماشیني وسایل هم عجیب او غریب چلن خپلوي.
د اوبو ځړوبی کې همیشنۍ لمبه، امریکا متحده ایالات
د امریکا په متحدو ایالتونو کې دا په طبیعي توګه رامنځ ته شوی یو غیرې عادي ابشار دی ( ځړوبی ) دی چې په منځ کې یې دننه یوه همیشنۍ زیړ رنګه لمبه ښکاري. ددې طبیعي پدیدې په اړه ویل کیږي چې په ابشار یا ځړوبي کې دننه د طبیعي ګازو د وتلو یو سوری دی چې هغه اور اخلي. کله ناکله دا اور ګل کیږي چې باید بیا ولګول شي. ځینې خلک باور لري که څوک دا لمبه لمس کړې نیکمرغه کیږي. خو لا هم کوم داسې کره ساینسي ثبوت نه شته چې معلومه کړې په ځړوبي کې ولې اوربلیږي؟
فرانګو کاسټیلو( Frangokastello) ماڼۍ ، یونان
دا د یونان په کرت ټاپو کې یوه تاریخي او لرغونې کلا ده. هر کال د مې د میاشتې په ورستیو کې پر دې کلا له یو لرغونې عبادت ځایه داسې سیوري راځي چې پلي سرتیرو او پر اسونو سپرو سرتیرو ته ورته دي. په ځانګړې توګه سهار مهال چې کله د سمندر اوبه ارامې او په هوا کې رطوبت زیات وي پر کلا دا سیوری د لس دقیقو لپاره لیدل کیدای شي.
ددې سیوري په اړه سیمه ایز ولسي روایت دادی چې په دې کلا کې ددې سیمې د ازادۍ لپاره د وژل شویو جنګیالیو ارواوې دي. ساینس پوهانو تر اوسه هم ددې سیورو لپاره کوم ساینسي دلیل نه دی موندلی.
په چین کې د کاڼو ځنګل
په چین کې د کاڼو دا ځنګل په پنځه سوه کلیومتره مربعه سیمه کې پروت دی. ویل کیږي چې د اهکو له ګاڼو جوړ دا ځنګل دوه سوه میلونه کاله پخوا راڅرګند شوی او تر هغې د دمخه دلته سمندر و. لرغون پوهان باور لري چې تر اوبو لاندې مځکنیو حرکتونو دا کاڼې تراشلي دي.
ددې ځنګل لاندې د کیوفینګ په نوم د اوبو یوه سمڅه هم د عجایبو ځای دی. دا سمڅه د اګست له میاشتې تر نومبر پورې په هر دیرش دقیقو یو ځل په دایروي شکل د اوبو راښکلو بړبوکۍ جوړوي او په څو دقیقو کې ورکیږي.
د پنځو رنګونو سیند ، کولمبیا
دا سیند د کال په ډیره برخه کې د نورو سیندونو په شان وي، خو په اوړي کې د څو رنګونو په یو فرش بدل شي. ډیر ځانګړي ډوله واښه دا سیند په سر، ګلابي، ابي، شین او زیړو رنګونو واړوي. ساینس تر اوسه ددې سیند د اوبو د رنګه کیدو لپاره کوم دلیل نه دی موندلی، د ځايي خلکو افسانې وايي چې تر دې سیند لاندې د ”اوبو د مور“ خزانه پټه ده.
د وینو ځړوبی ، انټرکټیکا
د انترکتیکا په کنګلونو کې د وینو رنګ ته ورته د سرې مایع دا ځړوبی ان په منفي لس درجو سړې هوا کې هم نه کنګل کیږي. دا د نړۍ د بهیدونکې مایعاتو څخه یوه تر ټولو سړه مایع ګڼل کیږي.
د هارورډ پوهنتون یو شمیر پوهانو ثابته کړې چې په سیمه کې په طبیعي توګه موجود میکروبونه د وینې ددې ځړوبې د رامنځ ته کیدو سبب شوی ، چې د نړۍ یوه نه باوریدونکي پدیده یې رامنځ ته کړې.
دا یوې یوازې څو بیلګې وې چې موږ ته په مخه راغلې، پر دې سربیره نړۍ له بې شمیره داسې عجایبو ډکه ده، چې د بشر اوسنۍ پوهه او ساینسي معلومات یې په راز او څرنګوالي لا هم نه پوهیږي.
