د اُلمپيک نړیوالي کمېټې پریکړه وکړه، چي د ۲۰۲۰م کال د اُلمپيک سیالۍ د کرونا ویروس له امله وځنډوي.
ټاکل سوې وه د اُلمپيک نړیوالي لوبي د روان ۲۰۲۰م کال د جولای میاشتي په ۲۴مه نېټه د جاپان په توکیو ښار کي پيل سي، خو اوس پرون یکشنبه د کرونا ویروس له امله وځنډېدې.
د ځنډولو راپور ئې په رسمي ډول ندی خپور سوی، خو ډېر ژر به په رسمي ډول خپور سي.
د اُلمپيک نړیواله کمېټه د ملي کمیټو او د ملي فدراسیونونو له لوري تر فشار لاندي وه، تر څو دا لوبي وځنډوي، چي بلاخره یادي کمېټې خپله پرون یوه ناسته وکړه او د ځنډولو پرېکړه ئې وکړه.
د اُلمپيک نړیوالي کمېټې تر اوسه د نوي نېټې د څرګندولو په اړه پرېکړه ندی کړې، خو یاده کمېټه وايي، چي په یوه مناسب وخت کښي به ئې په اړه پرېکړه وکړي.
د اُلمپیک نړیوالي کمېټې مشر توماس باخ په لومړیو کي ویله، چي په هیڅ وجه به د اُلمپيک نړیوالي لوبي ونه ځنډول سي، خو وروسته د هیوادونو تر فشارونو لاندي راغی او کرار کرار ئې خپل دریځ واوښت او د ځنډولو پریکړه ئې وکړه.
اوس د کرونا ویروس له امله لوبغاړي نسي کولای تمرینونه ترسره کړي او ټولي ورزشي لوبي لغوه سوي.
د اُلمپیک لوبي په هرو څلورو کلنو کي یو ځلي تر ۲۰۰ د ډیرو هیوادونو ترمنځ ترسره کیږي، چي په دې لوبو کي خورا ډیري لوبي شاملي دي.
د اُلمپيک په نړیوالو سیالیو کي له افغانستان هم په بیلابیلو ورزشي څانګو کي لوبغاړي ګډون کوي.
