لیکنه: صادق طارق
د طلاقونو په اړه به مو ډېر اوریدلي وي، په نړۍ کې اوس دا جنجال عام شوی او ډېرې جوړې یا په خوښۍ یا خپګان سره جدا کیږي.
خو د امازون اینټرنیټي پلورنځي د مالک او نړیوال شتمن جف بزوس او مېرمنې طلاق عجیبه کیسه شوه.
ګران بیه طلاق
جف بزوس خپلې طلاق کړې مېرمنې مک کنزي ته د طلاق نه وروسته ۳۵ میلیارده ډالره ورکړل او هم یې د خپل پلورنځي په سهم کې ۴ سلنه ونډه ورکړه.
امازون پلورنځی جف بزوس ۲۵ کال پخوا تاسیس کړی.
لومړنی ټویټ
مک کنزي پرخپلې ټویټر پاڼې په لومړي ځل ټویټ کړی او همدا د ژوند ملګري نه یې د جدا کیدو خبره پکې کړې ده.
کنزي لیکلي، چې په یادو شویو اقتصادي شرایطو له یو بله جلا شوي.
دغې جوړې د نویمې میلادي لسیزې له پيله تراوسه ګډ ژوند کاوه، چې ثمره یې ۴ اولادونه دي.
د امازون په اړه
امازون په انټرنیټ کې په نړیواله کچه تر ټولو لوی پلورنځی دی.
تېرکال د دغه پلورنځي د خرڅلاو کچه ۲۳۲ میلیارده ډالرو ته رسیدلې وه.
دا پلورنځی په ۱۹۹۴ کې تاسیس شوی، چې تراوسه یې جف بزوس ته ۱۳۱ میلیارده ډالره شتمني ورکړې.
د مېرمنې په اړه
مک کنزي بروس، چې د امازون پلورنځي د مالک مېرمنه ده، مسلک یې لیکوالي ده.
هغې د کیسه لیکنې هنر له نوبل ګټونکي لیکوال توني موریسون څخه زده کړی.
موریسون د نوموړې په اړه ویلي، چې له بهترینو شاګردانو څخه یې وه.
دویم ګران بیه طلاق
د مک کنزي او جف بزوس له طلاقه مخکې د نړۍ ترټولو ګران بیه طلاق د مشهور سوداګر الک ویلدر ستاین او مېرمنې یې و.
هغوی په ۱۹۹۹ کې جلا شول، چې پروخت یې ویلدرستاین خپلې مېرمنې ته ۳،۸ میلیارده ډالره ورکړې.
