آې پي ایل په ۲۰۰۸ کال کې پیل شوی له هغه وخته یې سپانسري یا مالي ملاتړ ځېنې کمپنۍ او اشخاص کوي.
دلته یې په اړه بشپړ معلومات درکوو:
ممبيي لوبډله
د ممبيي لوبډلې مالکه موکېش امباني دی؛ خو چارې یې انېتا امباني پر مخ وړي.
په دې کې د هندوستان سپورټس شخصي کمپنۍ هم ګډون لري.
د دې لوبډلې لوبډلمشر روهېت شرما دی، دې لوبډلې درې ځلې د آې پي ایل اتلولي ګټلې.
چینای سوپرکېنګز لوبډله
د دې لوبډلې لوبډلمشر مخکښ لوبغاړی ایم ایس ډوني دی، د دې لوبډلې سپانسر د هندوستان سېمنټو کمپنۍ ده، چې مشر این سرېنېواسان دی.
دې لوبډلې درې ځلې د آې پي ایل اتلولي ګټلې او د مارچ په ۳۱ مه نېټه د نومرو په جدول کې په لومړي مقام کې وه.
ډیلي کپېټلز لوبډله
د دې لوبډلې نوم مخکې ډیلي ډېئر ډیویلز و، خو ۲۰۱۹ کال کې ډیویلي کپېټلز ته بدل شو.
د دې لوبډلې لوبډلمشري مختلفو لوبغاړو کړې؛ خو اوسنی لوبډلمشر یې هندی شيریاس ایئر دی.
د دې لوبډلې مالي ملاتړ جي ایم آر ګروپ کوي دا یوه ورزشي کمپني ده.
د کمپنۍ مشر راو نومېږي.
راجستان لوبډله
راجستان لوبډله ۲۰۰۸ کال کې د آې پي ایل اتله پاتې شوې وه، د دې لوبډلې اوسنی لوبډلمشر اجینکیا رهانی دی، او منوج بډالی یې مالک دی، دا رویال ملټي سپورټس په نامه یوه کمپني لري، لګښتونه یې همدا کمپني ورکوي.
رویال چلېنجرز بنګلور
بنګلور لوبډله د ویرات کولي له خوا رهبري کېږي، د دې لوبډلې مالي ملاتړی رویال چلېنجرز سپورټس شرکت دی او ډیاجیو په نامه شرکت هم ورسره مل دی.
کېنګز ایلیون پنجاب
ریوي چندرن اشوېن یې اوسنی لوبډلمشر دی د دې لوبډلې مالي ملاتړې د هندوستان د فلم نړۍ ستورې پرېټي زېنټا ده او نېس وادیا، موهېټ بورمنو او کرن پال هم ورسره شریکان دي.
افغان اتلس کلن ځوان مجیب ځدران د همدې لوبډلې برخه دی.
کلکته نایټ رایډرز لوبډله
دېنېش کارتېک یې اوسنی لوبډلمشر دی، دې لوبډلې دوه ځلې د ګاتم ګمبير په لوبډلمشرۍ کې اتلولي ګټلې، ستر مالي ملاتړی یې د هندوستان د سېنما ستوری شاه رخ خان دی، جی مېهتا هم ورسره دی، چې دی بیا د رایډرز په نامه ورزشي شرکت لري.
مېهتا د فلمي اداکارې جوهي چاولا خاوند دی.
سن رایزرز حېدراباد لوبډله
د سن رایزرز حېدراباد لوبډلې لوبډلمشر اوس مهال نیوزیلېنډی کېن ویلیمسن دی، ۲۰۱۶ کال کې ډېوېډ وارنر لوبډلمشر و او اتلولي یې هم ګټلې وه.
د دې لوبډلې مالک کلانېتي ماران دی او د سن په نامه نېټ ورک لري.
دوه افغان ستوري محمد نبي عیسی خېل او راشدخان ارمان هم همدې لوبډله کې لوبېږي او له ۲۰۱۶ م کال راهیسې ورسره ملګري دي.