ټاکل سوې وه د روسیې هیواد تکړه مسلمان لوبغاړی حبیب نورمحمدوف په روانه اپرېل میاشت کي د سرسخت امریکايي سیال توني فرګوسن په وړاندي ولوبیږي، خو دا لوبه د کرونا ویروس له امله لغوه سوه.
نورمحمدوف د یادي لوبي د لغوه کېدو په اړه وویل، چي د کرونا ویروس له امله نسي کولای امریکا هیواد ته یادي لوبي لپاره سفر وکړي، ځکه د روسیې ټول پروازونه لغوه سوي.
هغه زیاته کړه، چي د یو ایف سي سازمان مسئولینو راته څو میاشتي مخکي وویل، چي دا لوبه ممکن په امریکا او یا هم متحده عربي آماراتو کي ترسره سي.
حبیب پر خپل انسټاګرام لیکلي:
((د یو ایف سي سازمان سره تر خبرو وروسته مو پرېکړه وکړه، چي یوه میاشت مخکي تر لوبي باید آماراتو ته سفر وکړو، مګر وروسته چي مو آماراتو ته سفر وکړ، معلومه سوه، چي هغوی د کرونا ویروس له امله ټولي دروازې تړي او هیڅوک نسي کولای آماراتو ته داخل سي.))
هغه ویلي وروسته مجبوره سوو، چي د لوبي کولو پرته بیرته خپل هیواد روسیې ته سفر وکړو.
حبیب نورمحمدوف، چي دې لوبي ته ئې پوره چمتوالی نیولی وو او اوس هم د قرنطین په مهال په تمرینونو بوخت دئ.
حبیب نورمحمدوف وروسته له هغه نړیوال شهرت پيداکړ، چي ایرلینډ وتلي لوبغاړي مک ګرګور ته ئې ماته ورکړه.
